Read Kernewek Salmow 33 Bible Online

Salmow 33 - Kernewek bible

Salmow 33

¹Lowenhewgh y'n ARLOEDH, hwi an re wiryon. Gormola yw gwiw dhe'n re ewnhynsek.

²Gormelewgh an ARLOEDH gans telynn; kenewgh gormola dhodho gans sowtri a dheg kordenn.

³Kenewgh dhodho kan nowydh; tennewgh an kerdyn yn konnyk, gans garmow ughel.

⁴Rag ewn yw ger an ARLOEDH, hag oll y wriansow yw gwrys yn lenduri.

⁵Ev a gar ewnder ha gwirvreus; leun yw an norvys a dhader an ARLOEDH.

⁶Dre er an ARLOEDH an nevow a veu gwrys, hag oll aga lu gans anall y anow.

⁷Ev a guntellas dowrow an mor war-barth yn graghell; ev a worr an downderyow yn gwithvaow.

⁸Perthes own a'n ARLOEDH oll an nor; seves yn euth anodho oll trigoryon an norvys.

⁹Rag ev a gewsis, hag yndella y feu gwrys; ev a worhemmynnis ha pup-tra a sevis yn fast.

¹⁰An ARLOEDH a dhiswra kusul an kenedhlow; ev a dhiswra towlow an poblow.

¹¹Kusul an ARLOEDH a sev bynitha, prederow y golonn a unn henedh dhe'n nessa.

¹²Gwynnvys an genedhel hag yw an ARLOEDH hy Duw, an bobel dewisys ganso dhe vos y ertach y honan.

¹³An ARLOEDH a vir war-woeles dhiworth nev, hag a wel oll mebyon den;

¹⁴dhiworth tyller y drigva ev a vir orth oll trigoryon an norvys.

¹⁵Ev a form aga holonnow yn kettep penn, ev a aspi oll aga gwriansow.

¹⁶Nyns eus myghtern a allo bos selwys gans lu meur; nyns yw breselyas krev delivrys gans galloes meur.

¹⁷Euveredh yw trestya yn margh rag selwyans, ha nyns yw denvyth selwys gans y nerth bras.

¹⁸Otta, yma lagas an ARLOEDH war an re a berth own anodho, war an re a drest yn y dregeredh;

¹⁹may teliffro aga enev dhiworth ankow, ha'ga gwitha yn few yn termyn nown.

²⁰Agan enev a worta an ARLOEDH; ev yw agan gweres ha'gan skoes.

²¹Rag agan kolonn a lowenha ynno, drefenn ni dhe drestya yn y hanow sans.

²²Bedhes dha dregeredh, A ARLOEDH, warnan, kepar dell worryn agan trest ynnos.