Read Kernewek Salmow 39 Bible Online

Salmow 39 - Kernewek bible

Salmow 39

¹Dhe vester an keur: war Yeduthun, Salm a Davydh. Yn-medhav, ‘My a with ow fordhow rag na begghiv gans ow thaves; my a with ow ganow gans fronn hedre vo an tebelwas y'm gwel.’

²Avlavar en vy, ow tewel; kosel en vy, heb hebaska. Ow galar a wethhas;

³toemm o ow holonn ynnov vy; ha my ow prederi, an tan a dhewis, ha my a gewsis gans ow thaves:

⁴‘ARLOEDH, gwra dhymm godhvos ow diwedh, ha pyth yw musur ow dydhyow; may hwodhviv hirder ow bewnans.

⁵Otta, ty re wrug ow dydhyow avel nebes dornvedhi, ha'm oes yw avel travyth a-dheragos; yn hwir, pub den a sev avel anall. Sela.

⁶Rag den a gerdh avel skeus; yn hwir ev yw troblys yn euver; ev a wra bern a rychys ha ny woer piw a'n kuntell.

⁷‘Ha lemmyn, A Arloedh, pyth yw ow govenek? Ynnos jy yma ow fydhyans.

⁸Gwra ow delivra dhiworth ow hammwriansow oll. Na wra dhymm bos skorn an den foll.

⁹Avlavar en vy, ny igeris vy ow ganow, rag ty yw neb a wrug hemma.

¹⁰Kemmer dha strekys dhiworthiv; dre voemmenn dha leuv yth av vy dhe goll.

¹¹‘Pan geredhydh den, ow kessydhya kammweyth, ty a wra dh'y dekter teudhi dhe-ves kepar dell wra an goedhan; yn hwir, anall yw pub den. Sela.

¹²‘Klew ow fysadow, A ARLOEDH, ha ro skovarn dhe'm kri; na vydh tawesek orth ow dagrow. Rag alyon ov vy genes, godriger, avel ow thasow oll.

¹³Mir dhe-ves dhiworthiv, may fiv kennerthys, kyns my dhe dhiberth, heb bos namoy.’