Read Kernewek Salmow 40 Bible Online

Salmow 40 - Kernewek bible

Salmow 40

¹Dhe vester an keur. Salm a Davydh. My a wortas an ARLOEDH gans perthyans; hag ev a blegyas dhymm ha klewes ow kri.

²Hag ev a'm drehevis mes a'n pytt divlas, mes a'n pri leysek, ha gorra ow threys war garrek, ha fastya ow hammow.

³Hag ev re worras kan nowydh y'm ganow, kan a wormola dh'agan Duw. Lies huni a'n wel, ha perthi own, ha trestya y'n ARLOEDH.

⁴Gwynnvys an den re worras y fydhyans y'n ARLOEDH, ha na wra vri a'n re woethus na'n re a dreyl dhe falsuri.

⁵Meur yw niver dha varthusyon a wrussys, A ARLOEDH ow Duw, ha'th towlow ragon; nyns eus par dhiso jy. Mara's menekken vy, ha kewsel anedha, y fiens i moy es dell yllir aga nivera.

⁶Nyns osta hwansek dhe sakrifis hag offrynn; mes ty re igoras ow diwskovarn.[9] Offrynn leskys hag offrynn peghes ny wovynnsys,

⁷Ena y leveris, ‘Otta, devedhys ov; Yn rol an lyver yw skrifys ahanav.’

⁸My re vynnas gul dha volonjedh, ow Duw, yma dha lagha yn kres ow holonn.

⁹My re dherivas ewnder y'n kuntelles meur; otta, ny fronnis ow diwweus, dell wodhes, A ARLOEDH.

¹⁰Ny gelis dha ewnder y'm kolonn, my re gewsis a'th wirder ha'th selwyans; ny gelis dha dregeredh ha'th wirder dhiworth an kuntelles meur.

¹¹Na skon dhymm dha druedh, A ARLOEDH prest re'm gwittho vy dha dregeredh ha'th wirder.

¹²Rag ankenyow diniver re dheuth a-dro dhymm; ow hammweythresow re'm dalghennas ma na allav mires yn-bann; moy aga niver yns i ages blewennow ow fenn, ha'm kolonn a fyll dhymm.

¹³Dre dha vodh, A ARLOEDH, salw vy; A ARLOEDH, deus uskis dhe'm gweres.

¹⁴Perthens i meth ha bedhens shyndys war-barth, an re a hwila ow enev dh'y dhiswul; bedhens i treylys war-dhelergh ha konfondys an re a lowenha y'm pystik.

¹⁵Bedhens i yn ahwer drefenn aga meth neb a lever dhymm, Aha, aha.

¹⁶Lowenhes kemmys a'th hwila, ha bedhens heudhik ynnos jy; ha seul a gar dha selwyans prest leveres, ‘Re bo Duw meurhes!’

¹⁷Boghosek hag edhommek ov vy; mes an Arloedh a breder ahanav. Ty yw ow gwereser ha'm delivrer; ow Duw, na wra delatya.