Read Kernewek Salmow 42 Bible Online

Salmow 42 - Kernewek bible

Salmow 42

¹Dhe vester an keur. Maskil a vebyon Koragh. Kepar dell yeun an karow war-lergh goverow dowr, yn kettella y yeun ow enev war dha lergh, A Dhuw.

²Yma dhe'm enev syghes war-lergh Duw, an Duw bew. P'eur tov vy hag omdhiskwedhes a-dherag Duw?

³Ow dagrow re beu ow bara dydh ha nos, hag i ow leverel dhymm oll an jydh, ‘Ple'ma dha Dhuw?’

⁴My a berth kov a hemma, ow skoellya ow enev a-bervedh ynnov; fatell gerdhyn vy gans an routh orth aga hembronk dhe ji Duw; gans lev a lowena ha grasyans, yn mysk routh ow synsi dy'goel.

⁵Prag yth osta jy mar dhigolonnek, ow enev, ha prag yth hanesydh a-bervedh ynnov? Trest yn Duw; rag my a'n gormel prest rag selwyans y fas.

⁶Ow Duw, digolonnek yw ow enev a-bervedh ynnov; rakhenna my a berth kov ahanas a dir Yordan ha Hermon, a venydh Misar.

⁷Downder a elow dhe dhownder orth tros dha dhowrlammow; oll dha vordardh ha'th tonnow res eth dresov.

⁸Mes an ARLOEDH a worhemmynn y dregeredh dydhweyth, ha nosweyth y gan a vydh genev, pysadow dhe Dhuw ow bewnans.

⁹My a lever dhe Dhuw ow harrek, ‘Prag re'm ankevsys? Prag yth av vy ow kyni, ha'n eskar orth ow gwaska?’

¹⁰Ha'm eskern ow pos brewys, ow eskerens a'm skorn, ow leverel dhymm oll an jydh, ‘Ple'ma dha Dhuw?’

¹¹Prag yth osta jy mar dhigolonnek, ow enev, ha prag yth hanesydh a-bervedh ynnov? Trest yn Duw, rag my a'n gormel prest, selwyans ow fas, ha'm Duw.