Read Kernewek Salmow 44 Bible Online

Salmow 44 - Kernewek bible

Salmow 44

¹Dhe vester an keur. Maskil a vebyon Koragh. A Dhuw, ni re glewas gans agan diwskovarn, agan tasow re venegas dhyn ni, an gweythres a wrussys yn aga dydhyow i, y'n termyn koth.

²Gans dha leuv ty a fesyas an kenedhlow, mes ty a's plansas yn aga le; ty a dhistruis an poblow, ha gasa spas dhedha.

³Rag ny berghennsons an tir der aga kledha aga honan, ha nyns o aga bregh aga honan a ros budhogoleth dhedha; mes dha leuv dhyghow jy ha'th vregh, ha golow dha fas, rag ty a's kara.

⁴Ty yw ow Myghtern, A Dhuw; gorhemmynn budhogoleth dhe Yakob.

⁵Dredhos y herdhyn ni agan eskerens dhe'n dor; dre dha hanow ni a stank an re a sev er agan pynn.

⁶Rag ny drestyav y'm gwarak, nyns yw ow kledha a re dhymm an budhogoleth.

⁷Mes ty re'gan delivras dhiworth agan eskerens, ha gul bismer dhe'n re a'gan kas.

⁸Yn Duw re wrussyn ni bostya oll an jydh, ha ni a wormel dha hanow bys vykken. Sela.

⁹Byttegyns ty re'gan skonyas, ha'gan shamya, ha nyns edh jy yn-rag gans agan luyow.

¹⁰Ty a wra dhyn mos war-dhelergh dhiworth an eskar, ha'n re a'gan kas a raven dh'aga honan.

¹¹Ty re'gan ros avel deves dhe vos dybrys, ha re'gan skattras yn mysk an kenedhlow.

¹²Ty a werthas dha bobel a dravyth, ha dhiworth aga fris ny gemmersys prow.

¹³Ty a wra dhyn bos mewl dh'agan kentrevogyon, skorn ha ges dhe'n re usi yn agan kyrghynn.

¹⁴Ty a'gan gwra ensampel yn mysk an kenedhlow, ha gul dhe'n poblow shakya an penn orthyn.

¹⁵Oll an jydh yma ow disenor a-dheragov, ha meth ow fas re'm kudhas,

¹⁶orth lev an den a skorn ha kabla, drefenn an eskar ha'n dialor.

¹⁷Oll hemma re dheuth warnan, mes ny'th ankevsyn, ha ny wrussyn ni falsuri erbynn dha gevambos.

¹⁸Ny dreylyas agan kolonn war-dhelergh, ha ny blegyas agan kammow yn-mes a'th hyns,

¹⁹kyn y'gan brewsys yn tyller owrgeun, ha'gan kudha gans skeus ankow.

²⁰Mar ankevyn ni hanow agan Duw, hag ystynn agan diwleuv dhe Dhuw estren,

²¹a ny hwither Duw hemma? Rag ev a woer kevrinyow an golonn.

²²A'th wovis jy yth on ni ledhys oll an jydh, reknys on ni avel deves dhe'n ladhva.

²³Difun, prag y koskydh, A Arloedh? Sav, na skon ni bynitha.

²⁴Prag y kudhydh jy dha fas, hag ankevi agan anken ha'gan poenvotter?

²⁵Rag agan enev yw plegys dhe'n doust; agan torr a len orth an dor.

²⁶Sav, ha gweres dhyn ni; ha daspren ni a-barth dha dregeredh.