Read Kernewek Salmow 45 Bible Online

Salmow 45 - Kernewek bible

Salmow 45

¹Dhe vester an keur: war Shoshannim. Maskil a vebyon Koragh; kan kerensa. Yma awen y'm kolonn ow tyghtya kan fin; my a gan ow ober gwrys rag an Myghtern; ow thaves yw pluvenn dhe skrifennyas freth.

²Tekka osta jy ages mebyon den; leun a ras yw dha dhiwweus, rakhenna Duw re'th vennigas bynitha.

³Kolm dha gledha war dha vordhos, ty vreselyas, gans dha splannder ha'th veuredh.

⁴Hag y'th veuredh marghok yn siwena drefenn gwirder hag uvelder hag ewnder; ha'th leuv dhyghow a dhysk dhis taklow euthyk.

⁵Lymm yw dha sethow, an poblow a goedh yn-dannos; i a wysk yn kolonn eskerens an myghtern.

⁶Dha se, A ARLOEDH, a dhur bys vykken ha bynnari. Gwelenn dha vyghterneth yw gwelenn a ewnder.

⁷Ty a garas ewnder ha kasa sherewneth. Rakhenna Duw, dha Dhuw jy, re'th untyas gans oyl lowender a-ugh dha gowetha.

⁸Yma sawer myrr, aloes ha kassia war dha wiskow oll. Yn-mes a balasys a dhans-olifans, telynnow a'th lowenha;

⁹yma myrghes myghternedh yn mysk dha wragedh bryntin; orth dha leuv dhyghow y sev an vyghternes gwiskys yn owr a Ofir.

¹⁰Klew, A vyrgh, ha gwel, ha pleg dha skovarn; hag ankov dha bobel ha chi dha das.

¹¹Ha'n Myghtern yw hwansek dhe'th tekter; rag ev yw dha ARLOEDH, ytho gwra y wordhya.

¹²Myrgh Tyr a vydh a-ragos gans ro, ha'n dus rych yn mysk an bobel a bys dha favour,

¹³gans pub sort a daklow drudh. Myrgh an Myghtern yw leun a splannder a-berth y'n palys; hy gwisk yw oberys gans owr.

¹⁴Hi a vydh dres dhe'n myghtern yn dillas brosys; an maghtethyon hy howethesow neb a's hol, a's hembronk dhis.

¹⁵Gans heudhder ha lowender i a vydh hembrenkys; yth ons i yn palys an Myghtern.

¹⁶Dha vebyon a vydh yn le dha dasow; ty a's gwra pennternedh war oll an nor.

¹⁷My a wra dhe govadh dha hanow durya a unn henedh dhe'n nessa; rakhenna an poblow a'th wormel bys vykken ha bynnari.