Read Kernewek Salmow 49 Bible Online

Salmow 49 - Kernewek bible

Salmow 49

¹Dhe vester an keur. Salm a vebyon Koragh. Klewewgh hemma, oll an poblow; rewgh skovarn, oll an re usi trigys y'n norvys.

²Tus isel hag ughel, an den rych ha'n den boghosek war-barth.

³Ow ganow a gews a furneth; ha prederow ow holonn a re dhis konvedhes.

⁴My a bleg ow skovarn dhe barabolenn; my a styr ow lavar tewl war an sowtri.

⁵Prag y porthav own yn drog dhydhyow, pan omsett kammweyth ow eskerens a-dro dhymm?

⁶I a drest yn aga fythow hag a vost yn braster aga rychys.

⁷Mes devri ny yll nagonan anedha prena y vroder, na ri daspren dhe Dhuw ragdho.

⁸Re ger via daspren aga enev, res yw gasa henna bynitha;

⁹rag may fewo bynitha ha ma na wello an pytt.

¹⁰Rag ev a wel tus skiansek dhe verwel, ha'n den anfur ha'n talsogh keffrys a dhe goll, ha gasa aga fythow dhe dus erell.

¹¹Aga bedh yw aga chi bynitha, ha'ga annedhow a unn henedh dhe'n nessa; i a elow aga thiryow herwydh aga henwyn aga honan.

¹²Mes ny bes den yn enor; haval yw dhe'n bestes a verow.

¹³Hemm yw fordh an re dalsogh; ha plegadow dh'aga henedh yw aga lavarow. Sela.

¹⁴Avel deves ymons i gorrys yn ifarn; ankow a's bugel, ha'n re ewnhynsek a wra maystri warnedha y'n myttin. Aga furv a dhifyk; ifarn a vydh aga thre.

¹⁵Mes Duw a dhaspren ow enev dhiworth dalghenn ifarn, rag ev a'm degemmer. Sela.

¹⁶Na borth own mar kwrer dhe dhen bos kevoethek, pan vo splannder y ji moghhes.

¹⁷Rag ny gemmer ganso travyth pan varwo; ny dhiyskynn y splannder war y lergh.

¹⁸Rag ev a vennigas y enev hag ev yn few, ha tus a'th wormel pan siwenydh.

¹⁹Ev a dhe henedh y dasow, ny welons golow bynitha.

²⁰Mes den, hag ev yn enor, ny gonvedh; haval yw dhe'n bestes a verow.