Read Kernewek Salmow 5 Bible Online

Salmow 5 - Kernewek bible

Salmow 5

¹Dhe vester an keur: gans pibow. Salm a Davydh. Ro skovarn dhe'm geryow, A ARLOEDH; gwra vri a'm hanasa.

²Goslow orth lev ow kri, ow Myghtern, ha'm Duw, rag dhiso jy y pysav.

³A ARLOEDH, y'n myttin ty a glew ow lev; y'n myttin my a orden ow fysadow orthis, ha goelyas.

⁴Rag nyns osta Duw a gemmerro plesour yn sherewneth; ny yll drog triga genes jy.

⁵Ny sev an re woethus y'th wolok; ty a gas an dhrogoberoryon oll.

⁶Ty a dhistru an re a wowlever; an ARLOEDH a gas an gour goesek ha fals.

⁷Mes my a dheu y'th chi dre dha dregeredh meur; my a omblek troha'th tempel sans yn own ahanas.

⁸Hembronk vy, A ARLOEDH, y'th ewnder drefenn ow eskerens; gwra dha fordh kompes a-dheragov.

⁹Rag nyns eus lelder yn aga ganow; aga holonn yw terroes. Aga lonk yw logel igor, i a fekyl gans aga thaves.

¹⁰Gwra dhedha perthi kessydhyans aga fegh, A Dhuw; koedhens i der aga husulyow aga honan; towl i dhe-ves herwydh aga lies treuspass; rag i re sevis er dha bynn.

¹¹Mes lowenhes seul a hwila skovva ynnos, kanens i rag joy bynitha, rag ty dh'aga gwitha, ha bedhes heudhik ynnos an re a gar dha hanow.

¹²Rag ty, A ARLOEDH, a vennik an den gwiryon; ty a'n kudh gans favour kepar ha gans skoes.