Read Kernewek Salmow 51 Bible Online

Salmow 51 - Kernewek bible

Salmow 51

¹Dhe vester an keur. Salm a Davydh, pan dheuth Nathan an profoes dhodho, wosa ev dhe vos a-ji dhe Bathsheba. Bydh grassyes orthiv, A Dhuw, herwydh dha dregeredh; herwydh dha druedh meur defend dhe-ves ow hammweythresow.

²Golgh vy yn tien a'm anewnder, ha glanha vy dhiworth ow fegh.

³Rag my a aswonn ow hammwriansow, ha prest a-dheragov yma ow fegh.

⁴Er dha bynn jy, ty dha honan, y peghis vy ha gul an drogober ma y'th wolok, rag may fes ewnhes y'th lavar, ha divlam y'th vreus.

⁵Otta, yn kammweyth y feuv vy dineythys, hag yn pegh y'm omdhuk ow mamm.

⁶Otta, hwansek osta dhe wirder y'n rannow a-bervedh, hag yn-dann gel ty a dhysk dhymm furneth.

⁷Glanha vy gans hyssop ha dibegh vydhav; golgh vy, ha my a vydh gwynna es ergh.

⁸Gwra dhymm klewes lowena ha heudhder, may lowenhaho an eskern a vrewsys.

⁹Kudh dha fas rag ow feghosow, ha defend dhe-ves oll ow hammweythresow.

¹⁰Gwra kolonn lan ragov, A Dhuw, ha daswra ynnov vy spyrys len.

¹¹Na dowl vy dhe-ves a'th fas ha na gemmer a-dhiworthiv dha Spyrys sans.

¹²Daskorr dhymm lowena dha selwyans ha menten vy gans dha Spyrys hel.

¹³Ena y tyskav dha fordhow dhe'n dhrogoberoryon, ha peghadoryon a dhehwel dhis.

¹⁴Gwra ow delivra dhiworth kabel-goes, A Dhuw, ty Dhuw ow selwyans; ha'm taves a gan yn lowen a'th ewnder.

¹⁵A Arloedh, igor ow diwweus, ha'm ganow a dhiskwa dha wormola.

¹⁶Nyns osta hwansek dhe sakrifis, poken my a'n rosa dhis; ny gemmerydh plesour yn offrynnow leskys.

¹⁷Sakrifisow Duw yw spyrys trogh; kolonn drogh ha keudhesik, A Dhuw, ny dhispresydh.

¹⁸Gwra da, y'th plegadow, orth Sion; drehav fosow Yerusalem.

¹⁹Ena ty a' fydh delit yn sakrifisow ewnder, offrynnow leskys ha kowlleskys; ena yth offrynnons lodhnow war dha alter.