Read Kernewek Salmow 56 Bible Online

Salmow 56 - Kernewek bible

Salmow 56

¹Dhe vester an keur: war Yonath Elem Rehokim[11]. Miktam a Davydh, pan y'n dalghennas an Filistysi yn Gath. Bydh grassyes orthiv, A Dhuw, rag den a vynn ow helghya; oll an jydh ev a omladh, orth ow gwaska.

²Ow eskerens re'm helghyas oll an jydh, rag lies a omladh er ow fynn gans goeth.

³Y'n eur may porthav own my a drest ynnos jy.

⁴Yn Duw y hwormolav y er ev, yn Duw y trestyav, ny borthav own; pandr'a yll kig dhe wul er ow fynn?

⁵Oll an jydh i a gammgemmer ow geryow; yma oll aga frederow er ow fynn rag drog.

⁶I a omguntell, i a omgel, i a verk ow hammow, pan gontrewaytyons ow enev.

⁷Gwra aga rewardya herwydh aga sherewneth; yn sorr, towl an poblow dhe'n dor, A Dhuw.

⁸Ty re verkyas ow gwandrans; gorr ow dagrow y'th votell. A nyns yns i skrifys y'th lyver?

⁹Ena y treyl ow eskerens war-dhelergh y'n jydh may halwav. Hemma a wonn; rag yma Duw genev.

¹⁰Yn Duw y hwormolav y er ev, y'n ARLOEDH y hwormolav y er ev.

¹¹Yn Duw y trestyav, ny borthav own; pandr'a yll den dhe wul er ow fynn?

¹²Yma dha ambosow warnav, A Dhuw; my a's tal dhis gans offrynnow gras.

¹³Rag ty re dhelivras ow enev dhiworth ankow, ha'm treys dhiworth trebuchya, rag may kerthiv a-rag Duw yn golow an re vew.