Read Kernewek Salmow 57 Bible Online

Salmow 57 - Kernewek bible

Salmow 57

¹Dhe vester an keur: Al Tashheth. Miktam a Davydh, pan fias dhiworth Sowl, y'n mogow. Bydh grassyes orthiv, A Dhuw, bydh grassyes orthiv, rag ow enev a hwila skovva ynnos; hag yn-dann skeus dha eskelli y fydh ow skovva, erna vo an droglammow ma tremenys.

²My a elow war Dhuw Ughella, war Dhuw a gowlwra pup-tra ragov.

³Ev a dhyllo dhiworth nev, ha'm selwel a dhespit an den a'm stank. Sela. Duw a dhannvon y dregeredh ha'y wirder.

⁴Yma ow enev yn mysk lewyon; ha my a wrowedh yn mysk tus ow flammya gans sorr; aga dyns yw guwow ha sethow, ha'ga thaves yw kledha lymm.

⁵Bydh ughelhes, A Dhuw, a-ugh an nevow; bedhes dha wolewder dres oll an nor.

⁶I re bareusis roes rag ow hammow, ow enev yw plegys dhe'n dor. I re gleudhyas pytt a-dheragov, hag i aga honan re goedhas a-bervedh ynno. Sela.

⁷Fast yw ow holonn, A Dhuw, fast yw ow holonn; kana a wrav vy, ha gormel.

⁸Difun, ow gordhyans; difunewgh, sowtri ha telynn; my a dhifun dhiworth an jydh.

⁹My a'th wormel, A Arloedh, yn mysk an poblow, ha kana gormola dhis yn mysk an kenedhlow.

¹⁰Rag dha dregeredh yw meur bys y'n nevow, ha'th wirder bys y'n ebron.

¹¹Bydh ughelhes, A Dhuw, a-ugh an nevow; bedhes dha wolewder dres oll an nor.