Read Kernewek Salmow 59 Bible Online

Salmow 59 - Kernewek bible

Salmow 59

¹Dhe vester an keur: Al Tashheth. Miktam a Davydh, pan dhannvonas Sowl tus dhe aspia orth y ji, rag y ladha. Gwra ow delivra dhiworth ow eskerens, A Dhuw; gwith vy rag an re a sev er ow fynn.

²Gwra ow delivra dhiworth an dhrogoberoryon; ha gwra ow selwel a'n dus woesek.

³Rag otta, i a gontrewayt ow enev; an re alloesek a omguntell er ow fynn. Heb kammweyth na pegh genev, A ARLOEDH,

⁴resek a wrons i hag ombareusi heb kammweyth genev; difun dhe'm gweres, ha mir.

⁵Ha ty, A ARLOEDH, Duw an luyow, Duw Ysrael, difun dhe wul vri a'n kenedhlow oll; na vydh grassyes orth an fals dhrogoberoryon. Sela.

⁶I a dhehwel y'n gorthugher, i a dheskern avel ki ha poenya a-dro y'n sita.

⁷Otta, usa a wrons gans aga ganow, hag yma kledhedhyow yn aga gweusyow, ow leverel, ‘Piw a glew?’

⁸Mes ty, A Dhuw, a wra ges anedha; ty a hwerth orth oll an kenedhlow.

⁹Ow nerth vy, my a'th worta; rag Duw yw ow dinas.

¹⁰Duw ow thregeredh a a-dheragov; Duw a wra dhymm gweles ow mynnas war ow eskerens.

¹¹Na's ladh, ma na ankoffo ow fobel; gwra i dhe wandra gans dha nerth, ha'ga dri dhe'n dor, A Arloedh agan skoes.

¹²Rag pegh aga ganow, ha geryow aga gweusyow, bedhens i kemmerys yn aga goeth. Ha rag an mollethi ha'n gowleverel a leverons,

¹³distru i y'th sorr, distru, rag na vons moy. Godhvydhens i Duw dhe rewlya yn Yakob, ha bys yn pennow an nor. Sela.

¹⁴Hag y'n gorthugher i a dhehwel; i a dheskern avel ki ha poenya a-dro y'n sita.

¹⁵I a wander a-derdro rag boes, ha krodhvolas mar ny gevons lowr.

¹⁶Mes my a gan a'th nerth, ha my a gan yn ughel a'th tregeredh y'n myttin. Rag ty re beu ow dinas, ha skovva yn dydh ow anken.

¹⁷Dhiso jy, ow nerth, y kanav gormola; rag Duw yw ow dinas, an Duw a'm tregeredh.