Read Kernewek Salmow 60 Bible Online

Salmow 60 - Kernewek bible

Salmow 60

¹Dhe vester an keur: war Shushan Eduth. Miktam a Davydh; dhe dhyski; pan strivyas gans Aram Naharaym ha gans Aram Soba, ha pan ladhas Yoab dewdhek mil a dus Edom yn nans an Hoelan, hag ev ow tehweles. A Dhuw, ty re'gan skonyas, ha'gan terri; ty re sorras; treyl arta dhyn ni.

²Ty re gryghyllis an nor, ha'y folsa; yaghha y dorrvaow, rag ev a gren.

³Ty re dhiskwedhas dhe'th pobel taklow kales; ty re wrug dhyn ni eva gwin a benn-dro.

⁴Ty re ros baner dhe'n re a berth own ahanas, rag may fions dhiworth an warak. Sela.

⁵Rag may fo dha garadowyon delivrys, salw dre dha leuv dhyghow, ha klew vy.

⁶Duw re gewsis yn y sansoleth: ‘My a lowenha, ha ranna Shekem, ha musura nans Sukkoth.

⁷Gilead yw dhymm, ha Manasse yw dhymm; Efraym ynwedh yw nerth ow fenn; Yuda yw ow gwelenn.

⁸Moab yw ow seth-golghi; dres Edom y teghesav ow eskis; war Filistia my a arm yn trygh.’

⁹Piw a'm dre a-berth y'n dinas krev? Piw a'm hembronk bys yn Edom?

¹⁰A ny'gan forsaksys, A Dhuw? Nyns edh yn-mes gans agan luyow.

¹¹Ro dhymm gweres erbynn an eskar, rag euver yw gweres den.

¹²Dre Dhuw y hwren ni obereth meur; ev yw neb a stank agan eskerens.