Read Kernewek Salmow 61 Bible Online

Salmow 61 - Kernewek bible

Salmow 61

¹Dhe vester an keur: gans daffar kerdyn. Salm a Davydh. Klew ow garm, A Dhuw; goslow dhe'm pysadow.

²Dhiworth penn an nor y halwav warnas, pan yw gwann ow holonn. Hembronk vy dhe'n garrek yw ughella agesov.

³Rag ty re beu skovva dhymm, ha tour krev erbynn an eskar.

⁴My a drig y'th tylda bynitha; my a hwila skovva yn kudhans dha eskelli. Sela.

⁵Rag ty, A Dhuw, re glewas ow ambosow; ty re ros dhymm ertach an re a berth own a'th hanow.

⁶Ty a re dhe'n myghtern bewnans hir, y vlydhynyow dhe henedhow pals.

⁷Ev a drig a-dherag Duw bynitha; re'n gwittho tregeredh ha gwirder.

⁸Yndella y kanav gormola dhe'th hanow bynitha, ow tyli ow ambosow pub dydh oll.