Read Kernewek Salmow 63 Bible Online

Salmow 63 - Kernewek bible

Salmow 63

¹Salm a Davydh, pan esa yn difeyth Yuda. A Dhuw, ty yw ow Duw, my a'th hwila yn tiwysyk. Yma syghes dhe'm enev war dha lergh, ow hig a'n jeves hireth ragos, yn tir kras ha sygh ma nag eus dowr.

²Yn kettella re viris vy orthis y'n sentri, dhe weles dha nerth ha'th wolewder.

³Rag gwell yw dha dregeredh ages bewnans; ow diwweus a'th wormel.

⁴Ytho my a'th vennik hedre vewiv; my a dhrehav ow diwleuv dhe'th hanow.

⁵Ow enev a vydh kontentys kepar dell ve gans mer ha blonek, ha'm ganow a'th wormel gans diwweus heudhik,

⁶pan borthav kov ahanas war ow gweli, ha prederi ahanas yn goelyow an nos.

⁷Rag ty re beu ow gweres, hag yn skeus dha eskelli y kanav gormola.

⁸Ow enev a len orthis; dha leuv dhyghow a'm menten.

⁹Mes an re a hwila ow enev rag y dhistrui yth ons yn rannow isella an nor.

¹⁰I a vydh delivrys dhe nerth an kledha; i a vydh rann dhe'n owrgeun.

¹¹Mes an myghtern a lowenha yn Duw; oll an re a de yn y hanow ev a vost, rag ganow an re a wowlever a vydh degeys.