Read Kernewek Salmow 66 Bible Online

Salmow 66 - Kernewek bible

Salmow 66

¹Dhe vester an keur. Kan. Salm. Gwrewgh tros heudhik dhe Dhuw, oll an nor;

²kenewgh gordhyans y hanow, gwrewgh dh'y wormola bos gloryus.

³Leverewgh dhe Dhuw, ‘Ass osta euthyk y'th wriansow! Dre vraster dha nerth yth omblek dha eskerens dhiso jy.

⁴Oll an nor a'th wordh; ha kana dhis, ha gormel dha hanow.’ Sela.

⁵Dewgh, ha gwelewgh gwriansow Duw; euthyk yw ev yn y weythres orth mebyon den.

⁶Ev a dreylyas an mor dhe dir sygh; mayth ethons der an avon war dreys; ena ni a lowenhas ynno.

⁷Ev a rewl der y nerth bynitha; y dhewlagas a aspi an kenedhlow; na vedhes an re worth ughelhes.

⁸Bennigewgh agan Duw, hwi boblow, ha gwrewgh dhe lev y wormola bos klewys,

⁹neb a with agan enev yn bewnans, ha ny as agan treys dhe drebuchya.

¹⁰Rag ty, A Dhuw, re'gan provas; ty re'gan assayas, dell yw arghans assayys.

¹¹Ty a asas dhyn koedha y'n roes; ty a worras ahwer war agan diwglun.

¹²Ty re wrug dhe dus marghogeth dres agan pennow; ni a dremenas dre dan ha dre dhowr, mes ty a'gan dros yn tyller ledan.

¹³My a dheu y'th chi gans offrynnow leskys; ha my a dal dhis ow ambosow,

¹⁴a leveris ow diwweus hag a gewsis ow ganow pan esen yn poenvos.

¹⁵My a brof dhis offrynnow leskys a enyvales peskys, gans ynkys hordhes; my a offrynn lodhnow gans gever. Sela.

¹⁶Dewgh ha klewewgh, oll hwi a berth own a Dhuw, ha my a dheriv an pyth a wrug ev rag ow enev.

¹⁷My a elwis warnodho gans ow ganow, hag yth esa gormola war ow thaves.

¹⁸Mar kwellen vy sherewneth y'm kolonn, ny'm klewsa an Arloedh.

¹⁹Mes Duw yn hwir re glewas; ev re woslowas orth lev ow fysadow.

²⁰Bennigys re bo Duw, na dreylyas ow fysadow dhe-ves, na skonya ri dhymm y dregeredh.