Read Kernewek Salmow 69 Bible Online

Salmow 69 - Kernewek bible

Salmow 69

¹Dhe vester an keur: war Shoshannim. Salm a Davydh. Salw vy, A Dhuw, rag an dowrow re dheuth bys y'm enev.

²My a sedh yn leysek dhown, ma nag eus tyller may seffiv; my re dheuth yn dowrow down, may hwra an livow resek warnav.

³Skwith ov vy ow karma; ronk yw ow bryansenn. Ow dewlagas a fyll, ha my ow kortos ow Duw.

⁴Moy es blewennow ow fenn yw an re a'm kas heb ken; lies yw an re a vynn ow distrui, ow fals eskerens. An pyth na wrug vy y ladra, a wrav vy y daskorr?

⁵A Dhuw, ty a aswonn ow follneth, ha nyns yw ow hammwriansow kudhys ragos.

⁶Na as an re a'th worta dhe berthi meth a'm govis vy, A Arloedh, DUW an luyow; na as an re a'th hwila dhe vos konfondys a'm govis vy, A Dhuw Ysrael.

⁷Rag a-barth dhiso jy y perthis vy bismer, despit re gudhas ow fas.

⁸My re dheuth ha bos estren dhe'm breder, hag estren dhe fleghes ow mamm.

⁹Rag tan ow holonn a-barth dha ji re'm kollonkas, ha despit an re a'th skorn jy re goedhas warnav vy.

¹⁰Pan wrugavy dhe'm enev kyni gans penys, treylys o henna yn mewl dhymm.

¹¹Ha my a omwiskas yn yskar, my eth ha bos ensampel dhedha.

¹²An re a esedh y'n porth a gews er ow fynn, ha'n bennow-medhow a gan ahanav yn ges.

¹³Mes ow fysadow yw dhiso jy, A ARLOEDH; yn prys plegadow, A Dhuw, gorthyp dhymm y'th tregeredh veur, yn gwirder dha selwyans.

¹⁴Gwra ow delivra dhiworth an leysek, rag na setthiv; gas vy dhe vos delivrys dhiworth an re a'm kas, hag yn-mes a dhowrow down.

¹⁵Na as an livow dhe vos warnav, ha na as an downder dhe'm kollenki, ha na as an pytt dhe dhegea y anow warnav.

¹⁶Gorthyp dhymm, A ARLOEDH, rag da yw dha dregeredh; treyl dhymmo vy, herwydh dha druedh meur.

¹⁷Ha na gudh dha fas rag dha was, drefenn ow bos yn anken, gorthyp dhymm yn skon.

¹⁸Deus nes dhe'm enev, ha'y brena; gwra ow delivra dhiworth ow eskerens.

¹⁹Ty a aswonn ow mewl, ha'm meth, ha'm despit; yma oll ow eskerens a-dheragos.

²⁰Mewl re dorras ow holonn, ha paynys bras a'm beus. My a hwilas neb a gemmerra truedh ahanav, mes nyns esa; ha konforters, mes ny's kevis.

²¹I a ros dhymm ynwedh bystel rag ow boes, hag y'm syghes i a ros dhymm aysel.

²²Bedhes aga moes antell a-dheragdha, ha'ga offrynnow kres, bedhens antell.

²³Bedhes aga dewlagas tewl rag na wellons, ha gwra dh'aga diwglun prest krena.

²⁴Dyllo warnedha dha goler, ha re wrello dha sorr fers aga sesya.

²⁵Bedhes aga annedh ynyal; na vedhes triger yn aga thyldow.

²⁶Rag i a helgh an den a wrussys y weskel, hag ynkressya galar an re a vrewsys.

²⁷Gorr kammweyth dh'aga hammweyth i, ha na dhens i y'th ewnder.

²⁸Bedhens i defendys dhe-ves a lyver an re vew, ha na vedhens i skrifys yn mysk an re wiryon.

²⁹Ha my, truan ov vy ha poenvosek; re'm drehaffo dha selwyans, A Dhuw.

³⁰My a wormel hanow Duw gans kan, ha my a'n meurha gans grasyans.

³¹Ha hemma a vydh gwell gans an ARLOEDH ages ojyon, po ages lodhen ha dhodho kern ha karnow.

³²An re hwar a'n gwelas, ha lowen yns i; hwilewgh Duw, ha'gas kolonn a vew.

³³Rag an ARLOEDH a glew an re edhommek, ha ny dhispres ev an brisnoryon.

³⁴Gormeles ev nev ha nor, an moryow ha ow slynkya ynna.

³⁵Rag Duw a selow Sion, ha drehevel sitys Yuda; hag i a drig ena ha'y ferghenna.

³⁶Has y wesyon ynwedh a's erit, ha'n re a gar y hanow a drig ynni.