Read Kernewek Salmow 73 Bible Online

Salmow 73 - Kernewek bible

Salmow 73

¹Salm a Asaf. Da yn hwir yw Duw orth Ysrael, orth an re yw glan aga holonn.

²Byttegyns nammna drebuchyas ow threys; ogas disevys o ow hammow.

³Rag my a borthas envi orth an re woethus pan welis vy siwenyans an debeles.

⁴Rag nyns eus dhedha gloesow yn aga mernans; yagh ha krev yw aga horfow.

⁵Nyns yns i yn poenvotter dell yw tus erell, ha nyns yns i pystigys dell yw tus erell.

⁶Rakhenna yma goeth a-dro dh'aga honna avel torgh; garowder a's kudh avel kweth.

⁷Aga dewlagas a hwedh gans tewder; i a's teves moy ages konsayts aga holonn.

⁸I a wra ges, ha kewsel yn spitus; i a wodros arwask, ughel aga fenn.

⁹I re settyas aga ganow erbynn an nevow, ha'ga thaves a gerdh der an nor.

¹⁰Rakhenna ow fobel a dreyl dhedha, ha lapya oll aga lavarow avel dowr.[14]

¹¹Hag i a lever, ‘Fatell woer Duw? Eus godhvos gans an Ughella?’

¹²Otta, yndella yw an debeles; attes yns i pup-prys, ha'ga rychys a voghha.

¹³Sur, my re lanhas ow holonn yn euver ha golghi ow diwleuv yn gwiryonses.

¹⁴Rag oll an jydh yth en vy gweskys, ha pystigys pub myttin.

¹⁵Mar lavarren, ‘Yn kettella y kowsav vy’, my a draytas henedh dha fleghes.

¹⁶Pan ombrederis fatell gonvedhyn vy hemma, poenvotter o ev y'm golok vy,

¹⁷ernag yth vy yn sentri Duw; ena y konvedhis vy aga diwedh i.

¹⁸Sur, ty a's gorras yn tylleryow slynk; ty a wrug dhedha koedha yn terroes.

¹⁹Fatell ons i distruys yn unn lamm, difygys yns i yn tien gans browaghow!

²⁰Avel hunros pan dhifun den; A Arloedh, pan dhifunydh jy, ty a dhispres aga imaj.

²¹Rag moredhek o ow holonn, ha gloesow a envi eth der ow diwloneth.

²²Mar dalsogh en vy, ha diskians; kepar ha lodhen en vy a-dheragos.

²³Byttegyns yth esov vy prest genes; ty re'm synsis er ow leuv dhyghow.

²⁴Gans dha gusul ty a'm lew, ha wosa henna ow hemmeres yn golewder.

²⁵Piw a'm beus y'n nevow marnas ty? Ha nyns eus travyth war an nor a yeunniv marnas ty.

²⁶Ow hig ha'm kolonn a fyll, mes Duw yw nerth ow holonn ha'm rann bys vykken.

²⁷Rag ott, an re usi pell dhiworthis a dhe goll; ty re dhistruis oll an re a wra horyans er dha bynn.

²⁸Mes da yw ragov dos ogas dhe Dhuw; my re wrug an Arloedh DUW ow skovva, rag may teriffiv dha wriansow oll.