Read Kernewek Salmow 76 Bible Online

Salmow 76 - Kernewek bible

Salmow 76

¹Dhe vester an keur: gans daffar kerdyn. Salm a Asaf. Kan. Aswonnys yw Duw yn Yuda, meur yw y hanow yn Ysrael.

²Yn Salem yma y skovva, ha'y drigva yn Sion.

³Ena y torras ev sethow an warak, an skoes ha'n kledha hag arvow bresel. Sela.

⁴Splanna osta ha kreffa ages an menydhyow heb diwedh.

⁵An re golonnek o pyllys; i a goedhas yn kosk; ny wodhya nagonan a'n vreselyoryon gul devnydh a'y dhiwleuv.

⁶Orth dha geredh, A Dhuw Yakob, an charett ha'n margh a goedhas yn kosk poes.

⁷Ty, ty yw euthyk; ha piw a sev a-dheragos pan osta serrys?

⁸Ty a wrug dhe'th vreus bos klewys dhiworth nev; an nor a grenas, ha spavennhe,

⁹pan sevis Duw dhe vreus, dhe selwel oll an re hwar usi y'n nor. Sela.

¹⁰Sorr mab-den a dreyl dhe'th wormola; an remenant a'n sorr ty a wisk a-dro dhis avel grogys.

¹¹Gwrewgh ambos dhe'n ARLOEDH agas Duw, ha'y gollenwel; oll an re usi yn y gyrghynn, drens i rohow dhe neb a dal perthi own anodho.

¹²Ev a uvelha an spyrys a bennsevigyon; euthyk yw ev orth myghternedh an nor.