Read Kernewek Salmow 81 Bible Online

Salmow 81 - Kernewek bible

Salmow 81

¹Dhe vester an keur: war an Gittith. A Asaf. Kenewgh yn lowen dhe Dhuw agan nerth; gwra tros heudhik dhe Dhuw Yakob.

²Gwrewgh dhe'n menestrouthi seni, gweskewgh an tabourik, an delynn hweg gans an sowtri.

³Hwythewgh an trompa y'n loer nowydh, y'n loer leun, yn agan dy'goel.

⁴Rag hemm yw ordenans dhe Ysrael, ha lagha a Dhuw Yakob.

⁵Ev a erghis hemma yn Yosep rag dustuni, pan dheuth yn-mes a vro Ejyp. My a glew yeth na wrav hy godhvos ow leverel,

⁶‘My a dhifresas y skoedh a'n begh; y dhiwleuv a veu delivrys dhiworth an ganstell.

⁷Ty a elwis yn anken ha my a'th telivras; my a worthybis dhis yn keladow an daran; my a'th provas orth dowrow Meriba. Sela.

⁸Klew, ow fobel, ha my a dheg dustuni dhis; A Ysrael, unnweyth a koslewes orthiv!

⁹Ny vydh ynnos jy Duw astranj, ha ny wordhydh jy Duw estren.

¹⁰My yw an ARLOEDH dha Dhuw, a'th tug jy yn-mes a vro Ejyp. Igor dha anow a-les, ha my a'n lenow.

¹¹‘Mes ny woslowas ow fobel orth ow lev, hag Ysrael a'm skonyas.

¹²Ytho my a's gasas dh'aga holonn worth, dhe gerdhes herwydh aga husulyow aga honan.

¹³Unnweyth a koslowa ow fobel orthiv, hag Ysrael kerdhes yn ow fordhow vy!

¹⁴Ena my a fethsa aga eskerens yn skon, ha treylya ow leuv erbynn aga envi.

¹⁵An re a gas an ARLOEDH a omwrussa gostydh dhodho, ha'ga thermyn a via bys vykken.

¹⁶Ha my a'th vagsa gans gwaneth a'n gwella, ha gans mel dhiworth an garrek my a'th lanwsa.’