Read Kernewek Salmow 84 Bible Online

Salmow 84 - Kernewek bible

Salmow 84

¹Dhe vester an keur: war an Gittith. Salm a vebyon Koragh. Ass yw karadow dha drigvaow, A ARLOEDH an luyow!

²Ow enev yw hirethek, hi a yeun ynwedh war-lergh lysyow an ARLOEDH; ow holonn ha'm kig a arm yn lowen war an Duw bew.

³An golvan re gavas chi, ha'n wennel neyth rygdhi hi may hworro hy ydhnigow, dha alteryow jy, A ARLOEDH an luyow, ow Myghtern ha'm Duw.

⁴Gwynnvys an re a drig y'th chi; prest y fydhons orth dha wormel. Sela.

⁵Gwynnvys an den may 'ma y nerth ynnos jy, ha'th fordhow yn y golonn.[15]

⁶Pan dremenons dre nans Baka, i a'n gwra tyller a fentynyow, ha'n glaw a-varr a'n kudh gans bennathow.

⁷Yth ons a nerth dhe nerth; pubonan a vydh gwelys a-rag Duw yn Sion.

⁸A ARLOEDH, Duw an luyow, klew ow fysadow; goslow, A Dhuw Yakob. Sela.

⁹Gwel, A Dhuw, agan skoes, ha mir orth fas dha Untys.

¹⁰Rag unn jydh y'th klosyow yw gwell ages mil. Gwell via genev bos porther yn chi ow Duw ages annedhi tyldow sherewneth.

¹¹Rag an ARLOEDH Duw yw howl ha skoes; an ARLOEDH a re ras ha golewder, ha ny skon ev a ri dader vytholl dhe'n re a gerdh yn tivlam.

¹²A ARLOEDH an luyow, gwynnvys an den a worr y fydhyans ynnos jy.