Read Kernewek Salmow 85 Bible Online

Salmow 85 - Kernewek bible

Salmow 85

¹Dhe vester an keur. Salm a vebyon Koragh. Ty re beu grassyes, A ARLOEDH, orth dha dir; ty re dreylyas kethneth Yakob.

²Ty re avas kammweyth dha bobel, ha kudha oll aga fegh. Sela.

³Ty re gemmeras dhe-ves oll dha sorr; ty re dreylyas dhiworth dha sorr fers.

⁴Treyl ni, A Dhuw agan selwyans, ha gas dha sorr orthyn.

⁵A vydh sorr dhis orthyn ni bynitha? A ystynnydh dha sorr a unn henedh dhe'n nessa?

⁶A ny dreylydh ha'gan bewhe ni arta, rag may lowenhaho dha bobel ynnos jy?

⁷Diskwa dha dregeredh dhyn ni, A ARLOEDH, ha gront dhyn dha selwyans.

⁸My a woslow orth an pyth a lever Duw an ARLOEDH, rag ev a lever kres dh'y bobel ha dh'y syns; mes na dreylyens arta dhe follneth.

⁹Yn hwir yma y selwyans ogas dhe'n re a berth own anodho, may trykko golewder yn agan tir.

¹⁰Tregeredh ha gwirder re omguntellas; ewnder ha kres re ammas an eyl dh'y gila.

¹¹Gwirder a egin dhiworth an nor, ha ewnder a vir war-woeles dhiworth nev.

¹²Yn hwir an ARLOEDH a re dader, ha'gan tir a re y drevas.

¹³Ewnder a a-dheragdho, ha kres a gerdh yn fordh y olow.