Read Kernewek Salmow 86 Bible Online

Salmow 86 - Kernewek bible

Salmow 86

¹Pysadow a Davydh. Pleg dha skovarn yn-nans, A ARLOEDH, ha gorthyp dhymm, rag boghosek ov vy hag edhommek.

²Gwith ow enev, rag len ov vy; salw dha was, ow Duw, a drest ynnos jy.

³Bydh grassyes orthiv, A Arloedh, rag warnas jy y halwav oll an jydh.

⁴Lowenha enev dha was, rag dhiso jy, A Arloedh, y trehavav ow enev.

⁵Rag ty, A Arloedh, yw kuv ha parys dhe ava, meur dha dregeredh orth oll an re a elow warnas.

⁶Ro skovarn, A ARLOEDH, dhe'm pysadow, ha goslow dhe lev ow govynnadow.

⁷Yn dydh ow anken y halwav warnas, rag ty a worthyp dhymm.

⁸Yn mysk an duwow nyns eus nagonan kepar ha ty, A Arloedh, ha nyns eus gwriansow kepar ha'th wriansow jy.

⁹Oll an kenedhlow a wrussys jy a dheu hag omblegya a-dheragos, A Arloedh, ha gordhya dha hanow.

¹⁰Rag meur osta jy, ha ty a wra marthusyon; ty unnsel yw Duw.

¹¹Dysk dhymm dha fordh, A ARLOEDH, ha my a gerdh y'th wirder; lowenhes ow holonn, mayth ownniv dha hanow.

¹²My a'th wormel, A Arloedh ow Duw, a leun golonn, ha my a wordh dha hanow bys vykken.

¹³Rag meur yw dha dregeredh orthiv; ty re dhelivras ow enev dhiworth ifarn isella.

¹⁴A Dhuw, an re woethus re sevis er ow fynn, ha kuntellesow an dus fell re hwilas ow enev, ha ny'th worrsons a-dheragdha.

¹⁵Mes ty, A Arloedh, yw Duw truedhek ha grassyes, lent ow serri, ha meur dha dregeredh ha'th wirder.

¹⁶Treyl dhymmo vy, ha bydh grassyes orthiv; ro dha nerth dhe'th was, ha salw mab dha vaghteth.

¹⁷Diskwa dhymm tokyn a'th tader, ma'n gwello an re a'm kas, ha perthi meth, rag ty, A ARLOEDH, re weresas dhymm, ha'm hebaskhe.