Read Kernewek Salmow 88 Bible Online

Salmow 88 - Kernewek bible

Salmow 88

¹Kan. Salm a vebyon Koragh. Dhe vester an keur: war Mahalath Leannoth. Maskil a Heman an Esrahyas. A ARLOEDH Duw ow selwyans, my re armas dydh ha nos a-dheragos.

²Des ow fysadow a-dheragos; pleg dha skovarn dhe'm kri.

³Rag leun yw ow enev a boenvos, ha'm enev a nesha dhe ifarn.

⁴Reknys ov vy yn mysk an re a dhiyskynn dhe'n pytt; yth ov vy kepar ha gour heb nerth.

⁵Gesys yn mysk an re varow, kepar ha'n re ledhys neb a wrowedh y'n bedh, na berthydh kov anedha namoy, ha diberthys yns i dhiworth dha leuv.

⁶Ty re'm gorras y'n pytt isella, yn tylleryow tewl, hag yn downderyow.

⁷Dha gonnar yw poes warnav, ha ty re dhros warnav oll dha donnow. Sela.

⁸Ty re bellhas dhiworthiv oll an re aswonnys genev; ty re'm gwrug kasadow dhedha. Prisonys yn fast ov vy, ma na allav diank;

⁹ow lagas a fyll dre dhuwon. A ARLOEDH, my a elwis warnas pub dydh, my re ystynnas ow diwleuv dhis.

¹⁰A dhiskwedhydh marthusyon dhe'n re varow? A dhassergh spyrysyon an re varow dhe'th wormel? Sela.

¹¹A vydh dha dregeredh menegys y'n bedh, po dha lelder yn Abaddon?

¹²A vydh dha varthusyon aswonnys y'n tewolgow, ha'th ewnder yn tir ankov?

¹³Mes my a gri dhis rag gweres, A ARLOEDH; hag y'n myttin y teu ow fysadow a-dheragos.

¹⁴Prag, A ARLOEDH, y skonydh ow enev? Prag y kudhydh dha fas ragov?

¹⁵Truan veuv ha parys dhe verwel dhiworth ow yowynkneth; my re borthas own ahanas, ha diweres ov vy.

¹⁶Dha gonnar res eth dresov; own ahanas re'm distruis.

¹⁷I a dheuth a-dro dhymm oll an jydh avel dowr; i a omsettyas a-dro dhymm a bub tu.

¹⁸Karer ha koweth a bellhasys dhiworthiv; yma an re aswonnys genev yn tewlder.