Read Kernewek Salmow 92 Bible Online

Salmow 92 - Kernewek bible

Salmow 92

¹Salm. Kan rag dydh an Sabot. Da yw grassa dhe'n ARLOEDH, ha kana gormola dhe'th hanow, an Ughella;[18]

²derivas dha dregeredh myttinweyth, ha'th lelder nosweyth;

³War dhaffar a dheg kordenn ha war an sowtri, war an delynn hweg hy thon.

⁴Rag ty, A ARLOEDH, re'm heudhhas dre dha wriansow, orth ober dha dhiwleuv my a arm yn lowen.

⁵A ARLOEDH, ass yw meur dha oberow! Pur dhown yw dha brederow.

⁶Ny woer gour talsogh, ha ny gonvedh den foll hemma.

⁷Pan las an debeles avel an gwels, ha pan siwen oll an dhrogoberoryon, ena y fydhons diswrys bynnari;

⁸mes yth esos yn ughelder bys vykken, A ARLOEDH.

⁹Rag otta, dha eskerens, A ARLOEDH, otta, dha eskerens a dhe goll, ha diberthys vydh oll an dhrogoberoryon.

¹⁰Mes ty re ughelhas ow horn avel korn an ojyon gwyls; ty re'm untyas gans oyl yr.

¹¹Ow lagas ynwedh a wel ow mynnas war ow eskerens; ha'm diwskovarn a glew ow mynnas a'n debeles a sev er ow fynn.

¹²An den gwiryon a las avel an balmwydhenn, hag ev a dyv avel kederwydhenn yn Lebanon.

¹³An re yw plynsys yn chi an ARLOEDH, a las yn klosyow agan Duw.

¹⁴I a dheg frut hwath yn aga hothni, hag y fydhons yr ha glas,

¹⁵rag may teriffons an ARLOEDH dhe vos ewnhynsek; ow harrek yw ev, ha nyns eus kammhynseth ynno.