Read Kernewek Salmow 97 Bible Online

Salmow 97 - Kernewek bible

Salmow 97

¹An ARLOEDH a reyn, lowenhes an nor; bedhes heudhik ynysow pals.

²Yma kommol ha tewlder a-dro dhodho; ewnder ha gwirvreus yw sel y se.

³Tan a gerdh a-dheragdho, ha leski y eskerens a-derdro.

⁴Y lughes a wolowa an norvys; an nor a'n gwelas, ha krena.

⁵An menydhyow a deudhis avel koer a-dherag an ARLOEDH, a-dherag ARLOEDH oll an nor.

⁶An nevow a dheriv y ewnder, hag oll an poblow re welas y wolewder.

⁷Perthes meth oll an re a serv imajys gravys, hag a vost yn koeg idolys; gordhyewgh ev, an duwow oll.

⁸Sion a glewas hag a lowenha, ha heudhik o myrghes Yuda, drefenn dha vreusow, A ARLOEDH.

⁹Rag ty, A ARLOEDH, yw ughel dres oll an nor; ty yw ughelhes yn feur a-ugh an duwow oll.

¹⁰Hwi neb a gar an ARLOEDH, kesiwgh drog; ev a with enevow y syns; ev a's delirv dhiworth dorn an debeles.

¹¹Golow a dardh rag an re wiryon, ha lowena rag an re ewnhynsek aga holonn.

¹²Lowenhewgh y'n ARLOEDH, hwi an re wiryon, ha grassiwgh dhodho ow kovhe y sansoleth.