Read Kernewek Lavarow Koth 14 Bible Online

Lavarow Koth 14 - Kernewek bible

Lavarow Koth 14

¹An venyn fur a dhrehav hy chi, mes follneth gans hy diwla hy honan a'n terr dhe'n dor.

²Neb a gerdh yn ewnhynseth a'n jeves own a'n ARLOEDH, mes neb yw kamm y hynsyow a'n dispres.

³Kows den foll yw gwelenn dh'y geyn, mes diwweus an re fur a's gwith.

⁴Yn tyller ma nag eus oghen, gwag yw an presep; mes askorr pals a dheu gans nerth an ojyon.

⁵Ny wowlever dustunier lel, mes fals dhustunier a dhiver gowyow yn-mes.

⁶Skornyer a hwila furneth ha ny's gyv, mes godhvos yw es rag den a gonvedhes.

⁷Ke a-dhiworth lok gour foll, rag ny gevydh godhvos war aga diwweus.

⁸Furneth den doeth yw dissernya y fordh, mes follneth fellyon yw toell.

⁹Fellyon a wra ges a amendya kammweyth, mes yn mysk an re ewnhynsek yma favour.

¹⁰An golonn a aswonn hy hwerowder hy honan, ha nyns yw estren kevrennek a'y joy.

¹¹Chi an debeles a vydh distruys, mes tylda an re ewnhynsek a vleujyow.

¹²Yma fordh a hevel ewn dhe wour, mes hy diwedh yw fordhow ankow.

¹³Yn hwarth hogen, an golonn yw trist, ha diwedh joy yw anken.

¹⁴Den dislen yn y golonn a vydh attylys rag y fordhow, mes gour da a vydh gobrys rag y weythresow.

¹⁵An re sempel a grys pup-tra, mes an den doeth a breder a gammow y dhewdroes.

¹⁶Den fur yw war hag a dreyl dhiworth droktra, mes an den foll a sorr heb fronn hag yth yw dibreder.

¹⁷Den yw tanek y natur a wra yn foll, ha gour a vrasow yw kasadow.

¹⁸An re sempel a erit follneth, mes an dhoethyon yw kurunys gans godhvos.

¹⁹An debeles a omblek a-rag an re dha, ha'n debeles orth yetow an den gwiryon.

²⁰An boghosek yw kasadow gans y gentrevek hogen, mes lies yw an re a gar an den rych.

²¹Neb a dhispres y gentrevek yw peghador, mes gwynn y vys neb yw kuv orth an voghosogyon.

²²An ny wandrons yn sowdhan an re a dhevis drog? An re hag a dhevis da a gyv tregeredh ha gwirder.

²³Yma gwayn yn pub lavur, mes kows an dhiwweus ny led saw unnsel dhe esow.

²⁴Kurun an re fur yw aga rychys, mes follneth yw garlont[11] an fellyon.

²⁵Gwir dhustunier a saw enevow, mes neb a gowlever yw toeller.

²⁶Yn own a'n ARLOEDH y kevir fydhyans krev, ha'y fleghes a's tevydh skovva.

²⁷Own a'n ARLOEDH yw fenten a vewnans, rag may haller avoydya maglennow ankow.

²⁸Yma glori myghtern yn palster a boblans, mes heb tus penntern yw diswrys.

²⁹Gour neb yw lent ow serri a'n jeves konvedhes meur, mes neb a sorr yn fysk a ughelha follneth.

³⁰Kolonn gosel a re bewnans dhe'n kig, mes avi a wra dhe'n eskern pedri.

³¹Neb a arwask den boghosek a arvedh y Wrier, mes neb yw kuv dhe'n voghosogyon a'n enor.

³²An tebelwas yw domhwelys der y dhroktra, mes an den gwiryon a'n jeves harber yn y lander.[12]

³³Furneth a bowes yn brys den a gonvedhes, hag yth yw aswonnys hwath yn kolonn fellyon.[13]

³⁴Ewnder a ughelha kenedhel, mes peghes yw meth dhe bobel bynag.

³⁵Gwas neb a dhyght yn fur a'n jeves favour an myghtern, mes y gonnar a goedh war neb a dhre mewl.