Read Kernewek Lavarow Koth 15 Bible Online

Lavarow Koth 15 - Kernewek bible

Lavarow Koth 15

¹Gorthyp medhel a dreyl konnar dhe-ves, mes ger tynn a dhre sorr yn-bann.

²Taves tus fur a afin godhvos, mes ganow an re foll a dhiver follneth.

³Yma dewlagas an ARLOEDH yn pub le, ow koelyas war an debeles ha'n re dha.

⁴Taves medhel yw gwydhenn a vewnans, mes kammder ynno a derr an spyrys.

⁵Den foll a skorn dyskybleth y das, mes neb a hwither keredh yw doeth.

⁶Yn chi an den gwiryon yma meur a dresor, mes gwayn an tebelwas a dhre anfeusi.

⁷Diwweus an re fur a les godhvos, mes ny wra kolonn fellyon yndella.

⁸Sakrifis an debeles yw tra gasadow dhe'n ARLOEDH, mes pysadow an re ewnhynsek yw y dhelit.

⁹Fordh an debeles yw tra gasadow dhe'n ARLOEDH, mes ev a gar neb a hol ewnder.

¹⁰Yma dyskybleth tynn rag neb a forsak an hyns; neb a gas keredh a verow.

¹¹Yma ifarn hag Abaddon a-rag an ARLOEDH, kemmys moy kolonn mebyon den.

¹²Ny gar skornyer bos keredhys; ny vynn mos dhe'n dus fur.

¹³Kolonn lowen a wra min lowenek, mes dre dristyns a'n golonn an spyrys yw trogh.

¹⁴Kolonn den a'n jeves konvedhes a hwither godhvos, mes ganow fellyon a beur follneth.

¹⁵Oll dydhyow an den arweskys yw drog, mes kolonn lowen a's teves gwledh heb fin.

¹⁶Gwell yw boghes gans own a'n ARLOEDH ages tresor meur hag ankres ganso.

¹⁷Gwell yw sand a erbys may ma kerensa ages ojyon peskys ha kas ganso.

¹⁸Gour konneryek a dhifun strif, mes neb yw lent ow serri a goselha kedrynna.

¹⁹Fordh an den diek yw kepar ha perth a spern, mes hyns an re ewnhynsek yw fordh-veur.

²⁰Mab fur a wra tas lowen, mes den foll a skorn y vamm.

²¹Follneth yw joy dhe neb na'n jeves skians, mes gour a gonvedhes a gerdh yn ewn.

²²Heb kusul towlow a dheu dhe vann, mes gans kusulyoryon bals i a siwen.

²³Gul gorthyp gwiw yw joy dhe wour, ha ger yn y dermyn, ass yw da!

²⁴Fordh bewnans a led yn-bann rag den doeth, dh'y witha rag mos dhe ifarn a-woeles.

²⁵An ARLOEDH a derr dhe'n dor chi an re woethus, mes ev a venten orven an wedhwes.

²⁶Tybyansow an tebelwas yw tra gasadow dhe'n ARLOEDH, mes geryow grassyes yw plegadow dhodho.

²⁷Neb yw kraf war-lergh gwayn anewn a wra trobel rag y deylu, mes neb a gas falswobrow a vew.

²⁸Brys an den gwiryon a ombreder fatell worthybir, mes ganow an debeles a dhiver drogedhow.

²⁹Yma an ARLOEDH pell dhiworth an debeles, mes ev a glew pysadow an re wiryon.

³⁰Golow an dewlagas a lowenha an golonn, ha nowodhow da a re nerth dhe'n eskern.

³¹An skovarn hag a woslow orth keredh yaghus a drig yn mysk an re fur.

³²Neb a skorn dyskybleth a omdhispres, mes neb a woslow orth keredh a gyv konvedhes

³³Dyskans furneth yw own a'n ARLOEDH, hag uvelder a dheu a-rag enor.