Read Kernewek Lavarow Koth 17 Bible Online

Lavarow Koth 17 - Kernewek bible

Lavarow Koth 17

¹Gwell yw krestennen sygh gans kosoleth ages chi leun a gevewya gans strif.

²Keth neb a dhyght yn fur a rewl mab neb a dhre mewl, hag ev a gevrenn an eretons yn mysk an vreder.

³An teudhlester yw rag arghans, ha'n forn yw rag owr, mes an ARLOEDH a brev kolonnow.

⁴Drogoberer a woslow orth diwweus dhrog; ha gowleveryas a re skovarn dhe daves dregynnus.

⁵Neb a skorn an boghosek a arvedh y Wrier; neb a lowenha pan wel terroes tus erell ny vydh divlam.

⁶Fleghes wynn yw kurun an re goth, ha glori mebyon yw aga thasow.

⁷Nyns yw kows fin gwiw dhe foll, hwath dhe le kows gowek dhe bennsevik.

⁸Falswober yw haval dhe ven hudel yn dewlagas an riyas; plepynag y treyl ev a siwen.

⁹Neb a av kammweythres a hwila kerensa, mes neb a gews arta a'n mater a wra dibarth yntra keskowetha.

¹⁰Yth a keredh downa yn den a gonvedhes ages kans strekys yn foll.

¹¹Ny hwila tebelwas saw unnsel rebellyans, mes kannas fell a vydh dannvenys er y bynn.

¹²Gwell yw dyerbynna orses ledrys hy orsigow, kyns foll yn y follneth.

¹³Mar attal nebonan drog rag da, nyns a drog nevra dhiworth y ji.

¹⁴Dalleth strif yw avel gasa dowr dhe skapya, ytho gas an gedrynn kyns hi dhe dardha yn-mes.

¹⁵Neb a akwit an tebelwas ha neb a dhampen an den gwiryon, aga dew yw tra gasadow dhe'n ARLOEDH.

¹⁶Prag yma an pris yn dorn foll rag prena furneth, pan nag eus dhodho an golonn dh'y gavoes?

¹⁷Koweth a gar pup-prys, ha broder yw genys rag gweres yn droglamm.

¹⁸Den heb skians a re goestel, hag ev a dheu ha bos gaja rag y gentrevek.

¹⁹Neb a gar kammwrians a gar strif, neb a dhrehav porth ughel a hwila distruyans.

²⁰Ny siwen den a golonn gamm, ha den ha dhodho taves treus a goedh yn anfeus.

²¹Neb a dhineyth mab gokki a'n jeves anken, ha nyns eus joy dhe'n das a foll.

²²Kolonn jolif yw sawment da, mes spyrys trogh a sygh an eskern.

²³Tebelwas a dhegemmer falswober a'n askra, rag kammdreylya hynsyow gwirvreus.

²⁴Yma furneth a-rag fas an den a gonvedhes, mes yma dewlagas foll war bennow an norvys.

²⁵Mab foll yw anken dh'y das, ha hwerowder dhedhi hi neb a'n omdhuk.

²⁶Nyns yw da beghya spal war den gwiryon; skorjya tus nobyl yw kamm.

²⁷Neb a fronn y eryow a'n jeves godhvos; ha neb a'n jeves spyrys kosel yw gour a gonvedhes.

²⁸Den foll a dew hogen yw synsys dhe vos fur; pan dhege y dhiwweus, ev yw breusys dhe vos poellek.