Read Kernewek Lavarow Koth 20 Bible Online

Lavarow Koth 20 - Kernewek bible

Lavarow Koth 20

¹Gwin yw skornyer ha korev a wra tervans, ha nyns yw fur neb yw kammledys gansa.

²Konnar euthyk myghtern yw avel lew owth usa, neb a'n serr a gyll y vewnans.

³Gordhyans yth yw dhe wour omwitha dhiworth strif, mes pub foll a vynn kedrynna.

⁴Ny aras an diek drefenn yeynder an kynyav; y'n drevas ev a hwila, ha ny'n jeves travyth.

⁵Kusul yn kolonn gour yw avel dowr down, mes gour a gonvedhes a'n tenn yn-bann.

⁶Lies den yw gelwys gour tregeredhus, mes gour lel, piw a yll y gavoes?

⁷Den gwiryon a gerdh yn tivlam: gwynnvys y fleghes war y lergh.

⁸Myghtern esedhys war y dron dhe vreusi a wynsell oll droktra gans y dhewlagas.

⁹Piw a yll leverel, ‘My re wrug ow holonn glan; pur ov a'm pegh’?

¹⁰Poesow divers ha musuryow divers, an dhew yw tra gasadow dhe'n ARLOEDH.

¹¹Yonker yw aswonnys der y weythresow, mars yns i pur hag ewnhynsek.

¹²An skovarn ow klewes ha'n lagas ow kweles — an ARLOEDH re's gwrug, aga dew.

¹³Na gar kosk, rag own ty dhe dhos dhe voghosogneth; igor dha dhewlagas, ha ty a' fydh kals a vara.

¹⁴‘Drog, drog!’ yn-medh an prener, mes pan a dhe-ves ev a vost.

¹⁵Yma owr, ha gemmow pals; mes an dhiwweus a wodhvos yw jowel drudh.

¹⁶Kemmer dillasenn an den a's ros avel gaja rag estren; syns an gaja re beu res rag estrenyon

¹⁷Bara kevys dre doell yw hweg dhe wour, mes a-wosa an ganow a vydh leun a rowynn.

¹⁸Towlow yw fondys dre gusul; gwra gwerrya dre gevarwoedhyans fur.

¹⁹Neb a gerdh a-dro avel hwedhler a dhiskudh kevrinyow; ytho na vydh keskoweth gans klappyer.

²⁰Neb a volleth y das po y vamm, y lugarn a vydh difeudhys yn tewlder down.

²¹Eretons kevys yn uskis y'n dalleth, ny vydh y dhiwedh bennigys.

²²Na lavar, ‘My a attal drog’; gorta an ARLOEDH hag ev a'th saw.

²³Poesow divers yw tra gasadow dhe'n ARLOEDH ha nyns yw da fals vantol.

²⁴Kammow gour yw ordenys gans an ARLOEDH, ytho fatell yll den konvedhes y fordh y honan?

²⁵Antell yw rag den ev dhe leverel ‘Sans yw!’ yn tibreder, ha prederi a'n ambos a-wosa.

²⁶Myghtern fur a wynsell an debeles, hag ev a dhre an ros warnedha.

²⁷Spyrys den yw lugarn an ARLOEDH ow hwithra an rannow a-bervedh.

²⁸Tregeredh ha gwirder a with an myghtern, ha'y dron yw mentenys gans tregeredh.

²⁹Glori gwer yowynk yw aga nerth, mes splannder an re goth yw aga blew loes.

³⁰Strokosow hag a woli a garth droktra dhe-ves, ha boemmennow a lanha an rannow a-bervedh.