Read Kernewek Lavarow Koth 24 Bible Online

Lavarow Koth 24 - Kernewek bible

Lavarow Koth 24

¹Na borth avi a dhrogoberoryon, na borth hwans dhe vos gansa.

²Rag aga holonn a dhevis freudh, ha'ga diwweus a gews a dhregynn.

³Gans furneth chi yw drehevys, ha gans konvedhes yth yw fondys.

⁴Gans godhvos an stevellow yw lenwys a rychys drudh ha teg a lies eghenn.

⁵Gour fur yw kreffa ages gour a nerth, ha gour gans godhvos agesso ev neb a'n jeves galloes.

⁶Rag dre gevarwoedhyans y hyllydh gwerrya, hag yma budhogoleth yn palster a gonseloryon

⁷Furneth yw re ughel rag den foll, hag ny iger ev y anow y'n yet.

⁸Neb a dewl droktra a vydh henwys gwrier a dhregynn.

⁹Towlow a follneth yw pegh, ha'n skornyer yw tra gasadow dhe dus.

¹⁰Mars os gyllys digolonnek yn dydh a anken, tanow yw dha nerth.

¹¹Deliver an re yw draylys dhe-ves dhe'n mernans, ha saw an re usi ow trebuchya troha dibennans.

¹²Mar leverydh, ‘Ny'n godhyen’, a ny'n gwel ev neb a boes an kolonnow? A ny'n goer ev neb a with dha enev? A ny attal dhe dhen herwydh y oberow?

¹³Ow mab, deber mel, rag da yw; mel dhiworth an gribenn yw hweg dhe'th stevnik.

¹⁴Yndella y fydh godhvos furneth dhe'th enev, mara's kevydh, ty a' fydh gwaytyans ragos, ha ny vydh dha wovenek treghys dhe-ves.

¹⁵Na gontrewayt kepar ha tebelwas ryb trigva an den gwiryon; na wra pylla y bowesva.

¹⁶Rag den gwiryon a goedh seythgweyth ha sevel arta, mes an debeles yw domhwelys gans droglamm.

¹⁷Na lowenha pan goedh dha eskar, ha na as dha golonn dhe vos lowen pan drebuch,

¹⁸poken an ARLOEDH a'n gwell ha bos drok-pes, ha treylya y sorr dhiworto.

¹⁹Na breder drefenn tus dhrog. Na borth avi orth an dhrogoberoryon.

²⁰Rag ny vydh dhe'n drogwas govenek rag an termyn a dheu. Lugarn an debeles a vydh difeudhys.

²¹Ow mab, porth own a'n ARLOEDH ha'n myghtern, ha na omvysk gans an eyl na'y gila.

²²Rag aga therroes a dheu a-dhistowgh, ha piw a woer an anfeusi a dheu dhiworta aga dew?

²³Yma an re ma ynwedh dhe'n re fur. Nyns yw ragvreusi da.

²⁴Neb a lever dhe'n den kablus, ‘Ankablus os’, a vydh milligys gans an bobel, kuhudhys gans an kenedhlow.

²⁵Mes dhe'n re a'n keredh, y fydh delit, ha bennath da a dheu warnedha.

²⁶Neb a re gorthyp ewn a re dhis amm war an dhiwweus.

²⁷Darbar dha ober a-ves, ha'y bareusi ragos y'n park, ha wosa henna drehav dha ji.

²⁸Na vydh dustunier erbynn dha gentrevek heb acheson, ha na gammled gans dha dhiwweus.

²⁹Na lavar, ‘My a dhyght den arall par dell y'm dyght, my a attal dhodho herwydh y weythres orthiv.’

³⁰My a dremenas park gour diek, ha lowarth gour diboell;

³¹hag ottava, gordevys o gans spern, kudhys o gans linas, ha'y fos a ven o terrys dhe'n dor.

³²Ena my a welas ha prederi anodho dour, my a viras warnodho ha dyski anodho.

³³Nebes kosk, nebes hun, nebes plegya an dhiwdhorn dhe bowes.

³⁴Yndella y teu boghosogneth warnas avel brybour,[16] hag esow avel gour ervys.