Read Kernewek Lavarow Koth 30 Bible Online

Lavarow Koth 30 - Kernewek bible

Lavarow Koth 30

¹Lavarow Agur mab Yake. Dargan an gour ma dhe Ithiel, dhe Ithiel hag Ukal.

²Re dalsogh ov yn sur dhe vos gour; Ny'm beus konvedhes denel.

³Ny dhyskis furneth, na ny'm beus godhvos a'n Sans.

⁴Piw a yskynnas dhe nev hag a dhiyskynnas? Piw a guntellas an gwyns yn palv y dhorn? Piw a vaylyas an dowrow yn dillasenn? Piw a fondyas oll pennow an norvys? Pyth yw y hanow, ha pyth yw hanow y vab? Yn sur, ty a woer!

⁵Pub ger a Dhuw yw purhes, skoes ywa dhe'n re a hwila skovva ynno.

⁶Na geworr travyth dh'y eryow, poken ev a'th keredh ha ty a vydh prevys gowek.

⁷Dew dra a bysav dhiworthis; na's nagh dhymmo vy kyns my dhe verwel:

⁸Gorr pell dhiworthiv falsuri ha gow, na ro dhymmo vy naneyl boghosogneth na rychys; mag vy gans an boes anodho ma'm beus edhomm,

⁹poken lenwys vydhav hag y'th naghav hag y lavarav, ‘Piw yw an ARLOEDH?’ Po y fydhav boghosek ha ladra, ha disakra hanow ow Duw.

¹⁰Na sklander gwas dh'y vester, poken an gwas a'th volleth ha ty a vydh synsys kablus.

¹¹Yma re hag a volleth aga thas ha na vennik aga mamm.

¹²Yma re yw pur yn aga dewlagas aga honan, mes nyns yns i glanhes a'ga fodredhes.

¹³Yma re — ass yw ughel aga dewlagas, ass yw kroghen aga dewlagas drehevys ughel!

¹⁴Yma re, mayth yw aga dyns kledhedhyow, hag avel kellylli yw aga diwen dhe dhybri an voghosogyon a-dhiwar an norvys, an edhommogyon dhiworth mab-den.

¹⁵Yma gel ha dhedhi diw vyrgh, ‘Ro, ro’, i a gri. Yma tri thra na gyv lowr nevra; yma peswar tra na lever nevra, ‘Lowr’:

¹⁶ifarn, torr wownagh, dor nag yw gwalghys nevra a dhowr ha'n tan na lever nevra, ‘Lowr.’

¹⁷An lagas hag a dhispres tas hag a skorn bos gostydh dhe vamm a vydh pigys yn-mes gans marghvrini an nans ha dybrys gans an eryon.

¹⁸Yma tri thra yw re varthys ragov, peswar na'm beus aga honvedhes:

¹⁹fordh er y'n ebron, fordh sarf war garrek, fordh gorhel war an keynvor, ha fordh gour gans mowes.

²⁰Hemm yw fordh avoutres: hi a dheber hag a sygha hy ganow ha leverel, ‘Ny wrug vy drog vyth.’

²¹Yn-dann dri thra an norvys a dhegren, yn-dann peswar ny'n jeves sevel:

²²keth pan a ha bos myghtern, foll pan yw gwalghys a voes;

²³benyn nag yw kerys pan gyv hi gour, ha maghteth pan gyv hi le hy mestres.

²⁴Yma peswar tra y'n norvys yw byghan, mes fur dres eghenn yth yns:

²⁵an moryon yw pobel nag yw krev, byttegyns i a guntell boes y'n hav;

²⁶an broghes yw pobel heb galloes, byttegyns i a wra aga annedhow y'n karregi.

²⁷Ny's teves an lokustes myghtern, byttegyns i oll a geskerdh rynnys yn bagasow;

²⁸y hyllir synsi pedresyf y'n dorn, byttegyns kevys yw yn palesyow myghternedh.

²⁹Tri thra yw teg yn aga herdhes, peswar yw teg yn aga gwayans:

³⁰an lew hag yw an kreffa yn mysk bestes gwyls ha na fi dhe'n fo a-rag onan anedha;

³¹an kulyek ow payoni, an bogh, ha myghtern gans y lu a-dro dhodho.[19]

³²Mars es foll, owth omughelhe, mars eses ow tevisya drog, gorr dha dhorn war dha anow.

³³Rag par dell dreyloubir leth rag gul kowles, ha dell weskir an troen dhe wul goes, yndella movya sorr a wra strif.