Read Kernewek Lavarow Koth 31 Bible Online

Lavarow Koth 31 - Kernewek bible

Lavarow Koth 31

¹Lavarow myghtern Lemuel, dargan a dhyskas y vamm dhodho.

²Pandra, ow mab? Pandra, mab ow thorr? Pandra, mab ow ambosow?

³Na ro dha nerth dhe venynes, na dha fordhow dhe'n pyth a dhiswra myghternedh.

⁴Ny dhelledh dhe vyghternedh, a Lemuel, ny dhelledh dhe vyghternedh eva gwin, po rewloryon dhe yeuni war-lergh korev;

⁵poken i a yv hag ankevi an taklow a veu ordenys, hag a gammdreyl gwir an voghosogyon.

⁶Ro korev dhe'n re usi yn eneworres, ha gwin dhe'n re usi yn hwerowder an enev.

⁷Evens hag ankevi aga boghosogneth, ha perthi kov a'ga ahwer na fella.

⁸Igor dha anow a-barth an den avlavar, rag gwir an re yw gorrys yn anles.

⁹Igor dha anow, breus yn ewn, ha pled ken an edhommek ha'n boghosek.

¹⁰Gwreg abel, piw a yll hy havoes? Hy bri yw druttha ages koral.

¹¹Kolonn hy gour a's teves fydhyans ynni, ha ny fyll gwayn vyth dhodho.

¹²Hi a dhiskwedh da dhodho, a-der drog, oll dydhyow hy bewnans.

¹³Hi a hwila gwlan ha lien, hag a ober gans diwleuv volonjedhek.

¹⁴Hi yw avel gorholyon an marchont, hi a dhre hy boes a dylleryow pell.

¹⁵Hi a sev yn-bann pan yw hwath nos, hag a bareus boes rag hy theylu, hag oberennow rag hy maghtethyon.

¹⁶Hi a ombreder a-dro dhe bark ha'y brena; gans gober hy diwleuv hi a blans gwinlann.

¹⁷Hi a wrogys hy diwglun gans nerth, hag a wra may fo hy diwvregh krev.

¹⁸Hi a surha bos gwayn da dh'y henwerth; ny vydh hy lugarn difeudhys nosweyth.

¹⁹Hi a worr hy diwleuv dhe'n gygel, ha'y diwleuv a syns an werthys.

²⁰Hi a iger hy leuv dhe'n voghosogyon, hag ystynn hy diwleuv dhe'n edhommogyon.

²¹Ny's teves hi own rag hy theylu pan wrer ergh, rag oll hy theylu yw gwiskys yn pann kogh.

²²Hi a wra rygdhi hy honan kolghesow, hy dillas yw sendal ha purpur.

²³Hy gour yw aswonnys yn yetow an sita, pan esedh yn mysk henavogyon an tir.

²⁴Hi a wra dillasennow a lin hag a's gwerth; hi a brovi grogysyow dhe'n varchons.

²⁵Nerth ha dynita yw hy dillas, ha hi a hwerth orth an termyn a dheu.

²⁶Hi a iger hy ganow gans furneth, hag yma an dyskans a dregeredh war hy thaves.

²⁷Hi a with war negys hy theylu, ha ny dheber an bara a dhiekter.

²⁸Hy fleghes a sev hag a's henow bennigys, ha'y gour ynwedh, hag ev a's gormel:

²⁹‘Lies benyn re wrug yn ta, mes ty re's tremenas oll.’

³⁰Gras a doell, ha tekter yw euver, mes benyn a's teves own a'n ARLOEDH yw dhe vos gormelys.

³¹Ro dhedhi rann a froeth hy diwleuv, ha re's gormello hy oberennow y'n yetow.