Read Kernewek Lavarow Koth 5 Bible Online

Lavarow Koth 5 - Kernewek bible

Lavarow Koth 5

¹Ow mab, goslow dour orth ow furneth, pleg dha skovarn war-tu ha'm kusul;

²rag may kyffi doethter, ha rag may hwittho dha dhiwweus godhvos.

³Rag diwweus benyn estren a syger mel, ha'y ganow yw moy smodh ages oyl;

⁴mes wor'tiwedh hi yw mar hwerow avel fuelenn, mar lymm avel kledha dewvinyek.

⁵Hy threys a dhiyskynn dhe ankow, ha'y hammow a led troha ifarn;

⁶Ny hwither hi an hyns a vewnans; hy fordhow a wander, ha dibreder yw hi.

⁷Ha lemmyn, a vebyon, goslowewgh orthiv, ha na dreylyewgh dhiworth geryow ow ganow.

⁸Gwith dha fordh pell anedhi, ha na dheus nes dhe dharas hy chi;

⁹rag own ty dhe ri dha enor dhe re erell, ha'th vlydhynyow dhe dhen fell;

¹⁰rag own estrenyon dhe vos lenwys a'th nerth, ha'th lavuryow dhe vos yn chi alyon;

¹¹hag orth diwedh dha vewnans yth hanasydh, pan dheu dha gig ha'th korf dhe dhiwedh,

¹²ha ty a lever, ‘Assa wren vy kasa dyskybleth, ha'm kolonn a dhispresyas keredh.

¹³Ny woslowsyn orth lev ow dyskadoryon, na plegya ow skovarn dhe'n re a'm dyski.

¹⁴Nammnag en vy dres dhe dhroktra glan yn mysk an bobel ha'n kuntelles.’

¹⁵Yv dowr a'th dowrargh dha honan, dowr ow resek mes a'th puth dha honan.

¹⁶Na as dha fentynyow dhe fenna y'n stret, na goverow a dhowr y'n plenys.

¹⁷Bedhens i ragos jy dha honan, a-der rag an re estren usi genes.

¹⁸Bedhes dha fenten bennigys, ha lowenha yn gwreg dha yowynkneth,

¹⁹ewik teg, gavrewiges rasek. Re wrello hy diwvronn dha dhisygha pup-prys; re bi medhow prest gans hy herensa.

²⁰Prag yth osta kammledys, ow mab, gans benyn estren, ha byrla diwvronn alyon?

²¹Rag yma fordhow gour a-rag dewlagas an ARLOEDH, hag ev a hwither oll y hynsyow.

²²An tebelwas yw maglennys gans y gammweythresow y honan, hag ev a vydh synsys fast yn kerdyn y begh.

²³Ev a verow drefenn fowt a dhyskybleth, ha drefenn y follneth veur yth a yn stray.