Read Kernewek Lavarow Koth 9 Bible Online

Lavarow Koth 9 - Kernewek bible

Lavarow Koth 9

¹Furneth re dhrehevis hy chi, hi re nadhas[7] hy seyth koloven.

²Hi re ladhas hy bestes, hi re vyskas hy gwin, hi re bareusis hy moes.

³Hi re dhannvonas hy maghtethyon rag gelwel dhiworth an ughella tylleryow y'n dre:

⁴‘Neb yw sempel treylys omma!’ Dhe neb na'n jeves skians hi a lever,

⁵‘Dewgh, dybrewgh a'm bara hag evewgh a'n gwin re vyskis.

⁶Gesiwgh sempledh ha bewewgh, ha kerdhewgh y'n fordh a gonvedhes.’

⁷Neb a reprev skornyer a'n jeves despit, ha neb a geredh drogoberer a berth pystik.

⁸Na geredh skornyer poken ev a'th kas; keredh den fur hag ev a'th kar.

⁹Ro dyskans dhe dhen fur hag ev a vydh furra hwath, dysk den gwiryon hag ev a ynkress yn dyskas.

¹⁰Own an ARLOEDH yw an dalleth a furneth, ha godhvos an Sans yw konvedhes.

¹¹Rag genev vy dha dhydhyow a vydh lieshes, ha blydhynyow dha vewnans a vydh ynkressys.

¹²Mars osta fur, yth yw rag dha les dha honan, mes mar skornydh, ty dha honan a'n perth.

¹³An venyn Follneth yw trosek, dibreder yw ha ny woer travyth.

¹⁴Hi a esedh orth daras hy chi, yn esedhva war dylleryow ughella an dre,

¹⁵ow kelwel dhe'n dremenysi usi ow mones poran war aga fordh,

¹⁶‘Neb yw sempel treylys omma!’ Ha dhe neb na'n jeves skians hi a lever,

¹⁷‘Dowr re beu ledrys yw hweg, hag yma blas da dhe vara dybrys yn-dann gel.’

¹⁸Mes ny woer ev spyrysyon an re varow dhe vos ena, ha bos hy gwestoryon yn downderyow ifarn.