Read Kernewek Ekklesiastes 11 Bible Online

Ekklesiastes 11 - Kernewek bible

Ekklesiastes 11

¹Dannvon dha vara war enep an dowrow, ha ty a wra y dhaskavoes wosa lies dydh.

²Ro rann a'th pythow dhe seyth po dhe eth, rag ny wodhesta py par happ drog y fydh y'n nor.

³Mars yw an kommol leun, i a wra diveri aga glaw war an dor, ha mar koedh gwydhenn po dhe'n dhyghowbarth po dhe'n gledhbarth, hi a wra growedha y'n keth le may koedh hi.

⁴Seul a vir orth an gwyns, ny wra ev hasa, ha seul a wel an kommol ny wra ev mysi.

⁵Kepar dell na wodhes fordh an gwyns, na hwath fatell yw formys eskern yn torr benyn usi gans flogh, yndella ny wodhesta ober Duw neb a wra pup-tra.

⁶Gwra hasa dha has y'n myttin, ha na as dha leuv dhe bowes bys y'n gorthugher, rag ny wodhesta pyneyl a wra siweni, po hemma po henna, po martesen aga dew war-barth a vydh da.

⁷Hweg yw an golow, ha da yw gans an dhewlagas gweles an howl.

⁸Ytho mar pyw den lies blydhen, gwres ev lowenhe ynna oll, mes perthes ev kov a'n dydhyow a dewlder, rag lower vydhons i. Euveredh yw pup-tra a dheu.

⁹Bydh lowen, A wour yowynk, y'th flogholeth, ha gas dha golonn dhe'th wul lowen yn dydhyow dha yowynkneth, ha gwra kerdhes yn fordhow dha golonn, hag yn golok dha dhewlagas, ha godhvydh, y hwra Duw dha dhri yn breus drefenn oll an taklow ma.

¹⁰Gwra dannvon sorr yn-mes a'th kolonn, ha dannvon drog yn-mes a'th kig, rag euveredh yw flogholeth ha yowynkneth.