Read Kernewek Ekklesiastes 2 Bible Online

Ekklesiastes 2 - Kernewek bible

Ekklesiastes 2

¹My a leveris y'm kolonn, ‘Deus, my a vynn dha brevi gans plesour rag gweles mars yw hemma 'vas’, hag otta, hemma ynwedh yw euveredh.

²A-dro dhe hwarth yn-medhav, ‘Follneth yw’, hag a-dro dhe blesour, ‘Pandr'a amont hemma?’

³My a hwilas y'm kolonn dhe blesya ow horf[2] gans gwin — gidys y'm brys gans furneth — ha dhe settya dalghenn yn follneth bys pan welvydhav pandr'yw da rag mebyon den dh'y wul yn-dann nev dres an nebes dydhyow a'ga bewnans.

⁴My a balshas ow rychys, my a dhrehevis chiow ragov vy ow honan ha plansa gwinlannow ragov vy ow honan.

⁵My a wrug ragov vy ow honan lowarthyow ha lies paradhis, ha plansa ynna pub eghenn a frutwydh.

⁶My a wrug dowrarghow ragov, rag dowrhe dhiworta koeswik a wydh ow klasa.

⁷My a brenas kethyon ha maghtethyon, ha dhymmo vy yth o an gethyon a veu genys y'm chi vy. Y'm bo ynwedh moy gwarthek ha moy greow es dell bewo an re esa yn Yerusalem kyns ow thermyn vy;

⁸my a vernyas hag arghans hag owr ragov vy ow honan, ha tresor a vyghternedh ha ranndiryow; my a gavas ragov vy ow honan kanoryon ha kanoresow, war-barth ha'n pyth a re delit dhe vebyon den — harim a iswragedh teg.

⁹Yndella my a dheuth ha bos bras, brassa es dell o oll an re esa yn Yerusalem kyns ow thermyn vy; hag ow furneth a sevi rybov.

¹⁰Pypynag a bysis ow dewlagas, ny skonis vy a'y ri dhedha, na ny skonis a ri plesour vytholl dhe'm kolonn. Ytho lowen o ow holonn drefenn oll ow lavur, ha hemm o ow gober rag oll ow lavur.

¹¹Ha my a viras orth pup-tra re wrug ow diwleuv, ha'n lavur a wrug vy dhe oberi, hag otta, pup-tra yw euveredh ha chasya war-lergh an gwyns, ha nyns eus gwayn yn-dann an howl.

¹²My a dreylyas dhe wodhvos furneth ha dhe gonvedhes muskokter ha follneth. Mes pandr'a yll gul an den a dheu wosa an myghtern, saw an dra re beu gwrys kyns?

¹³Ena my a welas bos gwayn dhe furneth moy ages henna dhe follneth, kepar dell yw gwayn an golow moy es henna dhe'n tewlder:

¹⁴An den fur — yma y dhewlagas yn y benn, mes an foll a gerdh yn tewlder. Byttegyns my a welas an keth tenkys dhe goedha warnedha aga dew. ...

¹⁵Ytho my a leveris y'm kolonn, ‘An pyth a hwyrvydh dhe'n foll, an keth henna a hwyrvydh dhymmo vy. Dhe bana borpos ytho y teuth vy ha bos mar fur?’ Hag y'm kolonn my a leveris, ‘Hemma ynwedh yw euveredh.’

¹⁶Ny vydh kov bys vykken naneyl dhe'n den fur, na dhe'n den foll, rag peub a vydh ankevys y'n dydhyow a dheu. Ass wra an den fur merwel kepar ha'n foll!

¹⁷Ytho my a gasas bewnans, rag poenvos dhymm yw pup-tra yw gwrys omma yn-dann an howl, drefenn bos pup-tra euveredh ha chasya war-lergh an gwyns.

¹⁸Ha my a gasas oll ow lavur a wrug vy dhe oberi yn-dann an howl, rag my dhe asa y frut dhe dhen a dheu wosa ow thermyn vy.

¹⁹Ha piw a woer mar pydh an den na po fur po foll? Byttegyns ev a wra maystri war frut ow lavur oll a wrug vy dhe oberi mar fur yn-dann an howl. Hemma ynwedh yw euveredh.

²⁰Ena my a dreylyas hag a asas ow holonn dhe goedha yn desper a-dro dhe'm lavur a wrug vy dhe oberi yn-dann an howl.

²¹Rag den a yll gul y ober gans furneth ha gans godhvos ha gans sleyghneth, byttegyns res yw dhodho ri y rann dhe dhen na oberis ragdho. Hemma ynwedh yw euveredh ha drog euthyk bras.

²²Pandr'a gyv den dhiworth oll y lavur ha dhiworth oll yeunadow y golonn a wra ev dhe oberi yn-dann an howl?

²³Rag oll y dhydhyow yw poen, ha'y ober yw keudh; ha hwath yn nos ny yll y golonn powes. Hemma ynwedh yw euveredh.

²⁴Nyns eus travyth gwell rag den ages dybri hag eva, ha bos lowen yn y lavur. Ynwedh my re welas hemma dhe dhos dhiworth leuv Duw.

²⁵Rag hebdho piw a yll dybri, ha piw yll kavoes plesour?

²⁶Rag dhe neb yw plegadow dhodho, Duw a re furneth ha godhvos ha plesour, mes dhe'n peghador ev a re an oberenn a guntell ha bernya rychys hag ena dhe ri an keth henna dhe biwpynag a vo plegadow dhe Dhuw. Hemma ynwedh yw euveredh ha chasya war-lergh an gwyns.