Read Kernewek Ekklesiastes 4 Bible Online

Ekklesiastes 4 - Kernewek bible

Ekklesiastes 4

¹Ytho my a dreylyas arta dhe weles oll an arwask yw gwrys yn-dann an howl. Hag otta, dagrow an dus arweskys: ny's teves konforter; denvyth ny's delirv dhiworth nerth aga arwaskoryon; ny's teves konforter.

²Ytho my a wormolas an re varow neb yw gyllys seulabrys dhe ankow moy ages an re neb yw hwath yn few.

³Mes gwell ages an dhew ma yw neb na veu genys hwath, drefenn na wrug ev gweles an drogober yw gwrys yn-dann an howl.

⁴Ha my a welas oll an trobel hag oll an sleyghneth yn lavur ow tos dhiworth avi den erbynn y gentrevek. Hemma ynwedh yw euveredh ha chasya war-lergh an gwyns.

⁵An foll a bleg y dhiwleuv hag a dheber y gig y honan.

⁶Gwell yw unn dornas gans kosoleth ages dew dhornas leun a lavur ha chasya war-lergh an gwyns.

⁷Ha my a dreylyas ha gweles ken tra euver yn-dann an howl:

⁸yma nebonan heb koweth, ny'n jeves naneyl mab na broder, ha nyns eus diwedh dhe oll y lavur, ha nyns yw y lagas gwalghys gans rychys. Ev a gyn, ‘Rag piw yth esov vy owth oberi, ha plesour ow fyllel dhe'm enev?’ Hemma ynwedh yw euveredh ha lavur beghus.

⁹Dew dhen yw gwell es onan, drefenn i dhe alloes kavoes pewas da dhiworth aga ober.

¹⁰Rag mar koedhons i, an eyl a wra drehevel y gila, mes go-ev a goedh ha ny'n jevydh denvyth a yll y weres ow tassevel.

¹¹Ynwedh, mar krowedh dew dhen war-barth, y's teves toemmder, mes fatell yll unn den kavoes toemmder?

¹²Ha kyn hyll den fetha unn den yw a'y honan, dew dhen a yll sevel orto. Kordenn driflek ny yll bos terrys yn skon.

¹³Gwell yw den yowynk ha boghosek ha fur ages myghtern koth ha foll, neb na vynn koela orth gwarnyans na fella.

¹⁴Rag mes a brison y teuth ev rag dos ha bos myghtern, kyn fe ev genys boghosek yn y ruvaneth y honan.[3]

¹⁵My re welas oll an re vew neb a gerdh yn-dann an howl, war-barth ha'n nessa flogh[4] a sev yn y le.

¹⁶Dhe'n bobel oll nyns esa diwedh, na dhe'n dus oll esa yn-dann y rewl; mes ny lowenha ynno an re a dheu a-wosa. Ytho hemma ynwedh yw euveredh ha yeuni war-lergh an gwyns.