Read Kernewek Ekklesiastes 5 Bible Online

Ekklesiastes 5 - Kernewek bible

Ekklesiastes 5

¹Pan edh dhe ji Duw, ke war dha gamm. Deus nes dhe woslowes a-der offra sakrifis kepar dell wra fellyon, drefenn na wodhons i dhe gammwul.[5]

²Na wra dhe'th tiwweus fyski, na wra dhe'th kolonn fistena ow tri ger a-dherag Duw, drefenn bos Duw y'n nev ha ty y'n nor; rakhenna bedhens boghes dha eryow.

³Kepar dell dheu hunrosow pan eus meur a fienasow, yndella y teu foll tavosek pan eus lies ger.

⁴Pan wredh ambos dhe Dhuw, na strech owth attyli dhodho, rag ny'n jeves Duw plesour yn fellyon. An pyth a ambosydh, tal e!

⁵Gwell yw na ambosydh ages gul ambos ha fyllel dhe attyli dhodho.

⁶Na as dha anow dhe wul dhe'th kig pegha; na lavar a-rag an gannas, ‘Kammgemmeryans veu.’ Prag y hwredh dhe Dhuw bos serrys orthis may tistrua ev ober dha dhiwla?

⁷Kepar ha dell eus euveredh yn lies hunros, yndella yma an keth henna yn lies ger. Ytho porth own a Dhuw.

⁸Mar kwelydh arwask an boghosek ha ladrans a wirvreus hag ewnder yn rannvro, na borth marth a'n dra. Rag dres soedhek ughel yma soedhek ughella, ha dres an re ma yma tus ughella hwath.

⁹An gwella tra rag pow yw myghtern, mayth yw y diryow y honan gonedhys yn ta.

¹⁰Neb a gar arghans ny vydh gwalghys gans arghans, na ny vydh neb a gar rychys gwalghys gans y bythow. Hemma ynwedh yw euveredh.

¹¹Pan veurha pythow den, an re usi orth aga dybri a veurha ynwedh, ytho pandr'yw gwayn an perghennek saw ev dh'aga gweles gans y dhewlagas?

¹²Hweg yw hun an gweythor, mar teber ev po boghes po meur; mes palster an den rych ny as dhodho koska.

¹³Yma drog ankensi re welis yn-dann an howl — rychys kuntellys gans y berghennek dh'y bystik y honan,

¹⁴mes kellys veu an rychys na der aventur anfeusik, ha nyns eus travyth gesys yn y dhorn rag an vab a dhineythis dhe erita.

¹⁵Kepar dell dheuth ev yn-mes a dorr y vamm, noeth y hwra dehweles kepar dell dheuth, ha ny gyv a'y lavur travyth a yll y gemmeres dhe-ves yn y dhorn.

¹⁶Hemm yw anfeus arall — kepar dell dheuth, yndella yth a. Pandr'yw an gwayn dhe neb a ober rag an gwyns?

¹⁷Yn sur ev a dhybri yn tewlder pub dydh oll a'y vewnans, hag yn sorr bras ha kleves ha tristyns ev a wodhevi yn fen.

¹⁸My re welas ow honan pandr'yw gwiw ha teg rag mebyon den dh'y wul — dhe dhybri hag eva ha lowenhe yn aga ober kales a wrons i dhe oberi yn-dann an howl, dres an nebes dydhyow a'ga bewnans re ros Duw dhedha, rag hemm yw aga rann.

¹⁹Pubonan re wrug Duw ri dhodho rychys ha pythow, ha re ros dhodho galloes dhe dhybri dhiworta, dhe dhegemmeres y rann ha dhe lowenhe yn y lavur — hemm yw ro Duw.

²⁰Rag ny berth kov meur a oll an boghes dydhyow a'y vewnans, drefenn Duw a'n gwith bysi dre blesour y golonn.