Read Kernewek Ekklesiastes 6 Bible Online

Ekklesiastes 6 - Kernewek bible

Ekklesiastes 6

¹Yma happ drog arall re welis yn-dann an howl, ha meur yw y boester war vab-den.

²Duw a re dhe wour rychys ha pythow hag enor ha ny fyll dh'y enev travyth yw hwansek dhodho, mes ny re Duw dhodho an galloes dhe dhybri a'n frut a'y lavur, mes estren a'n deber. Hemm yw euveredh ha kleves ankensi.

³Kyn tineyttho gour kans flogh ha bewa lies blydhen, kyn fewo hirneth mes ny yll ev bos lenwys gans y siwena, kyn na vo bedh dhodho, my a lavarsa, flogh genys marow yw feusikka agesso.

⁴Rag ev a dheu der euveredh, ha'y hanow yw kudhys yn tewlder;

⁵kyn na welas nevra golow an howl, na ny wodhva travyth, hwath ev a'n jeves moy powes ages an den na.

⁶Kyn hwrella ev bewa diwweyth mil vlydhen, nyns yw ev lowen yn y siwena. A nyns a pubonan dhe'n keth tyller?

⁷Oll an lavur a dhen yw rag lenwel y anow, mes nyns yw y enev lenwys nevra.

⁸Ytho pandr'a gyv an den fur moy es an den foll? Ha pandr'a gyv an boghosek dre wodhvos bewa?

⁹Gwell yw bos lowen gans an taklow a yll gweles an dhewlagas, ages an golonn dhe hwansa moy. An hireth ma yw euveredh ha chasya war-lergh an gwyns.

¹⁰Dhe'n dra a veu kyns, hanow a veu res seulabrys. Y hwodhor pandr'yw mab-den. Ny yll strivya gans den yw kreffa agesso.

¹¹Yma lies tra hag a balsha euveredh. Pandr'yw an gwayn dhe dhen?

¹²Rag piw a woer pandr'yw 'vas rag den hedre vo bew, dres an nebes dydhyow a'y vewnans euver, rag i a dremen kepar ha skeus. Rag piw a yll disklerya dhe dhen an taklow a hwyrvydh a'y wosa yn-dann an howl?