Read Kernewek Ekklesiastes 7 Bible Online

Ekklesiastes 7 - Kernewek bible

Ekklesiastes 7

¹Hanow da yw gwell es unyent da, ha dydh mernans yw gwell es dydh genesigeth.

²Gwell yw mos dhe ji kynvann ages mos dhe ji kevewi; rag bos mernans an denkys a beub oll ha res yw dhe'n den bew kemmeres henna yn y golonn.

³Gwell yw galar ages hwarth, drefenn dre dristyns an fas y teu ha bos gwell an golonn.

⁴Yma kolonn an dus fur yn chi kynvann, mes yma kolonn an fellyon yn chi plesour.

⁵Gwell yw degemmeres keredhi a dhen fur ages gour dhe woslowes orth kan fellyon.

⁶Rag kepar ha dell yw krakkyans spern yn-dann galter, yndellma yw hwarth an foll. Hemma ynwedh yw euveredh.

⁷Yn sur arwask a dreyl an den fur dhe dhen foll, ha ro a dhiswra an golonn.

⁸Gwell yw diwedhva tra ages y dhalleth; yndellma gwell yw perthyans ages goeth.

⁹Na fisten y'th spyrys dhe serri, rag sorr a bowes yn askra fellyon.

¹⁰Na lavar, ‘Prag yth o an dydhyow kyns gwell es an dydhyow hedhyw?’ Nyns yw fur govynn henna.

¹¹Furneth gans ertach yw da, hag yma gwayn dhe'n re a wel an howl.

¹²Rag furneth yw skovva, kepar ha dell yw mona skovva; mes gwayn godhvos a furneth yw hemma: ev a dhasvew an re a'n pew.

¹³Gwel ober Duw. Piw a yll ewnhe an pyth a gammas?

¹⁴Yn dydh siwena bydh lowen! Hag yn dydh a dhrog, gwra prederi a-dro dhe hemma. Duw re wrug an eyl ha'y gila, ma na allo denvyth diskudha travyth a hwyrvydh y'n termyn a dheu.

¹⁵My re welas oll hemma y'm dydhyow euver: treweythyow den mas a verow spit dh'y ewnder, ha treweythyow tebelwas a vew pell spit dh'y dhrogoberow.

¹⁶Na vydh re wiryon, na hwath re fur, rag na vi jy yn ahwer.

¹⁷Na vydh re dhrog, ha na vydh foll: prag y fynnydh merwel re a-varr?

¹⁸Da yw ty dhe settya dalghenn y'n eyl gwarnyans, ha na wra gasa dha dhalghenn yn y gila; rag neb a berth own a Dhuw a dhienk dhiworth oll an taklow ma.

¹⁹Furneth a re nerth dhe dhen fur, moy es deg rewler usi yn sita.

²⁰Rag nyns eus den gwiryon y'n norvys a wra dader ha ny begh mann.

²¹Ynwedh na ro dha golonn dhe bup-tra a lever tus, ma na glewvi dha was orth dha villiga.

²²Rag ty a woer y'th kolonn, ty dha honan dhe villiga tus erell lieskweyth.

²³My a brovas oll hemma dre furneth: my a leveris, ‘Sur, my a vynn bos fur’, mes yth esa pell dhiworthiv.

²⁴An pyth a vo pell, ha down, pur dhown — piw a yll y gonvedhes?

²⁵My a ombrederis y'm kolonn, may hwrellen hwilas ha hwithra ha konvedhes furneth ha resna, ha konvedhes droktra a follneth ha gokkineth a vuskokter.

²⁶Ha my a gyv bos moy hwerow ages mernans an venyn neb yw hy holonn maglennow ha roesow, ha neb yw hy diwla bondys. Neb yw da a-rag Duw a dhienk dhiworti, mes maglennys yw an peghador gensi.

²⁷‘Mir’, yn-medh an Pregowther, ‘hemma re gevis vy, onan hag onan, ha my ow hwilas an praga.

²⁸Re beu ow enev orth y hwilas, ha ny'n kevis vy. Unn den yn mysk mil re gevis, mes benyn y'n oll an re ma ny gevis mann.

²⁹Mir, hemma unnsel re gevis, Duw a wrug mab-den ewnhynsek, mes i, i re hwilas lies droktowl.’