Read Kernewek Ekklesiastes 8 Bible Online

Ekklesiastes 8 - Kernewek bible

Ekklesiastes 8

¹Piw yw kepar ha'n den fur? ha piw a woer an styryans a dra? Furneth den a wra dh'y fas golowi, ha semlans anhwek y fas yw treylys.

²Bydh gostydh dhe worhemmynn myghtern, drefenn an ti a wrussys dhe Dhuw.

³Na fisten dhiworth y wolok; na sav yn tra yw drog, rag ev a wra pypynag a vo plegadow dhodho.

⁴Le mayth usi ger myghtern, y'n keth le yma galloes, ha piw a lever dhodho, ‘Pandr'a wredh?’

⁵Piwpynag a with gorhemmynn, an keth henna ny wra perthi drog vyth, ha kolonn den fur a woer ha'n prys gwiw ha'n fara gwiw.

⁶Rag dhe bup-tra yma termyn gwiw ha fara gwiw. Mes begh meur war dhen yw,

⁷na woer ev a-dro dhe'n termyn a dheu, namoy ny yll denvyth leverel dhe dhen arall an pyth a hwyrvydh.

⁸Par dell nag eus dhe dhenvyth galloes war an gwyns dh'y dempra, yndella nyns eus dhe dhenvyth galloes war dhydh y vernans. Par dell ny yll souder bos relessys yn termyn an gas, yndella ny yll drog sawya an dhrogoberoryon.

⁹Oll hemma my re welas ha my ow settya ow brys dhe bup-tra yw gwrys yn-dann an howl. Treweythyow neb unn den a wra maystri war dhen arall dh'y dhrog y honan.

¹⁰Hag ena my a welas debeles ynkleudhys neb a wre dos y'n tyller sans ha mos yn-mes anodho, ha gormelys vons[6] y'n sita may hwrussons yndella. Hemma ynwedh yw euveredh.

¹¹Pan nag eus breus gwrys a-dhesempis rag neb drogober, kennerthys yw kolonn mebyon den dhe wul drog.

¹²Kyn hwrella peghador gul drogober kanskweyth, ha bewa hwath pell, yn spit dhe hemma my a woer y vos da gans an dus neb yw gostydh dhe Dhuw, rag i dhe sevel ow perthi own a-dheragdho.

¹³Mes ny vydh da gans an drogoberer, na ny wra ev hirhe y dhydhyow avel skeus, drefenn na sev ow perthi own a-dherag Duw.

¹⁴Ottomma euveredh arall yw gwrys y'n norvys: treweythyow yma tus wiryon a gyv an pyth a dhendil an debeles, ha treweythyow yma tebeles a gyv an pyth a dhendil an re wiryon. Yn-medhav, ‘Hemma ynwedh yw euveredh.’

¹⁵Ha my a gommendyas plesour, rag nyns eus travyth gwell rag den ages dybri hag eva, ha lowenhe. Ytho plesour a wra mos ganso yn y lavur dres dydhyow a'y vewnans re ros Duw dhodho yn-dann an howl.

¹⁶Pan res vy ow holonn dhe wodhvos furneth ha gweles an ober re beu gwrys y'n norvys — kyn lett hemma den rag koska naneyl yn nos nag yn dydh —

¹⁷ena my a welas pup-tra a veu gwrys gans Duw, mes ny yll mab-den konvedhes an pyth yw gwrys yn-dann an howl, rag kyn hwra mab-den lavurya dhe hwilas, ny gyv ev travyth; ha kyn hwrella den fur leverel ev dh'y gonvedhes, ny yll ev y gonvedhes yn tien.