Read Kernewek Ekklesiastes 9 Bible Online

Ekklesiastes 9 - Kernewek bible

Ekklesiastes 9

¹Ytho my a brederis oll a-dro dhe hemma y'm kolonn, owth assaya y dhismygi — bos an dus wiryon ha'n dus fur, keffrys ha'ga oberennow, yn leuv Duw. Naneyl kerensa na kas — ny's goer denvyth; yma pup-tra a-dheragdha.

²Dhe bubonan yma an keth tenkys — dhe'n den gwiryon ha dhe'n drogoberer, dhe'n den mas, dhe'n den glan ha dhe'n den avlan, dhe'n den a offer sakrifis ha dhe'n den na'n offer. An pyth a hwer dhe'n den mas a hwer ynwedh dhe'n peghador; an pyth a hwer dhe'n re a wra ti a hwer ynwedh dhe'n re a's teves own a wul ti.

³Hemm yw drog kevys yn pup-tra gwrys yn-dann an howl — yma an keth tenkys ow kortos pubonan. Dres henna, leun a dhrog yw kolonn mebyon den hag yn aga holonn yma follneth hedre vons bew, hag a-wosa yth ons dhe'n re varow.

⁴Mes piwpynag eus yn mysk an re vew a'n jeves govenek; gwell yw ki bew es lew marow.

⁵Rag an re vew a woer i dhe verwel, mes ny woer an re varow travyth; nyns eus pewas moy dhedha, ha kellys vydh hwath an kov anedha.

⁶An pyth a garens i war-barth ha'n pyth a gasens i hag a berthens avi orto res eth lemmyn dhe goll, ha nyns eus rann dhedha bys vykken a bup-tra yw gwrys yn-dann an howl.

⁷Ke, deber gans plesour dha vara, ha gans kolonn lowen yv dha win rag bos dha oberennow plegadow dhe Dhuw.

⁸Pup-prys bedhes gwynn dha dhillasow, ha gwayt na falla unyent y'th penn.

⁹Bydh lowen y'th vewnans gans dha wreg veurgerys oll an dydhyow a'th vewnans euver re ros dhis Duw yn-dann an howl, oll an dydhyow a'th euveredh, rag henn yw dha rann y'th vewnans, hag a'th lavur a wre'ta dhe oberi yn-dann an howl.

¹⁰Pypynag a gyv dha leuv dh'y wul, gwra e gans oll dha nerth, rag nyns eus nag ober na resna na godhvos na furneth yn ifarn le mayth edh.

¹¹My a dreylyas dhe weles yn-dann an howl nag yw pup-prys an resegva gwaynys gans an re yw skav, ha nag yw pup-prys an gas gwaynys gans an re yw galloesek, ha nag eus bara dhe'n re yw fur, ha nag eus rychys dhe'n re yw skentel, ha nag eus gras dhe'n re yw sleygh, drefenn bos ha termyn ha chons ow hwarvos dhedha i oll.

¹²Yn sur ny woer den y brys gwiw; kepar dell yw puskes kevys yn tebel roes, ha kepar dell yw ydhyn kevys yn maglenn, yndellma yth yw mebyon den maglennys yn termyn anfeus a goedh warnedha a-dhesempis.

¹³Hemma ynwedh re welis a-dro dhe furneth yn-dann an howl, hag yth hevelis dhymm bos neppyth a vri:

¹⁴yth esa sita vyghan hag ynni boghes tus, ha myghtern krev a dheuth dhedhi hag omsettya a-dro dhedhi ha drehevel tommennow meur er hy fynn.

¹⁵Ha trigys y'n sita na o gour boghosek mes fur, re wrug delivra an sita der y furneth, mes denvyth ny borthas kov a'n gour boghosek na.

¹⁶Hag yn-medhav, ‘Gwell yw furneth ages galloes, mes furneth an boghosek yw dispresys, ha nyns yw klewys y gusul.’

¹⁷Geryow tus fur yw klewys yn kosoleth moy es dell yw klewys garm rewler yn mysk fellyon.

¹⁸Gwell yw furneth ages arvow kas; mes unn peghador a yll distrui meur a dhader.