Read Kernewek An Gan a Ganow 3 Bible Online

An Gan a Ganow 3 - Kernewek bible

An Gan a Ganow 3

¹War ow gweli, dhiworth an nos, my a hwilas karadow ow enev; my a'n hwilas, mes ny'n kevis.

²‘My a sev yn-bann, ha mos a-derdro y'n sita, y'n stretys ha'n plenys, my a hwila karadow ow enev.’ My a'n hwilas mes ny'n kevis.

³An woelysi a'm kavas, hag i ow mos a-dro y'n sita, ‘A welsowgh karadow ow enev?’

⁴Skant nyns yth vy dhiworta, bys pan gevis karadow ow enev. My a settyas dalghenn warnodho, ha ny vynnis y dhelivra bys pan y'n drosen vy a-bervedh yn chi ow mamm, hag a-berth yn chambour an venyn neb a'm omdhuk.

⁵My a'gas konjor, A vyrghes Yerusalem, re'n yorghes po re'n ewigow a'n mesyow, Na wra dhe gerensa difuna na movya bys pan vynno hi!

⁶Piw yw hemma usi ow tos yn-bann a'n gwylvos, kepar ha kolovenyow a vog, yn mysk ethennow a vyrr ha frankynkys, a bub polter sawrek a'n marchont?

⁷Otta, yth yw gravath-kador Solomon! Yma tri-ugens kasor a-dro dhodho, a gasoryon Ysrael,

⁸pub huni anedha ow toen kledha ha dyskys yn vatel, pub huni gans y gledha orth y vordhos, erbynn peryll yn termyn nos.

⁹Myghtern Solomon a wrug dhodho gravath-kador a brenn Lebanon.

¹⁰Ev a wrug hy holovenyow a arghans, y geyn a owr, y esedh a burpur, a-bervedh, ispannys o gans ledher[5] gans myrghes Yerusalem.

¹¹Ewgh yn-mes ha mirewgh, a vyrghes Sion, orth myghtern Solomon gans an gurun may hwrug y vamm y guruna gensi yn dydh y dhemmedhyans, ha'n jydh mayth o lowen y golonn.