Read Kernewek An Gan a Ganow 5 Bible Online

An Gan a Ganow 5 - Kernewek bible

An Gan a Ganow 5

¹My re dheuth a-berth y'm lowarth, ow hwoer, ow fries, my re guntellas ow myrr gans ow spis, my re dhybris ow kribenn mel gans ow mel, my re evas ow gwin gans ow leth. Dybrewgh, A gowetha, evewgh, ha bedhewgh medhow dre gerensa.

²Yth esov vy ow koska, mes ow holonn yw difun. Son ow haradow ow knoukya: ‘Igor dhymmo vy, ow hwoer, ow hares, ow holommenn, ow benyn berfydh; rag bos ow fenn glyb dre luth, ow hudynnow dre lybor an nos.’

³My re dhiwiskas ow fows, yw res dhymm gwiska arta? My re wolghas ow threys, yw res dhymm aga mostya?

⁴Ow haradow a worras y leuv dre doll an klykket, ha'm torr a veu movyes ganso.

⁵My a sevis yn-bann dhe igeri dhe'm karadow, hag ow diwleuv a dheveras gans myrr, ha'm bysies gans lin myrr, war ebilyer an florenn.

⁶My a igoras dhe'm karadow, mes ow haradow a dreylyas, ha gyllys o dhe-ves. Ow enev a fyllis pan gewsis ev. My a'n hwilas, mes ny wrug vy y gavoes; my a'n gelwis, mes ny worthybis dhymm.

⁷An woelyadoryon a'm kavas, hag i ow mos a-dro y'n sita; i a'm gweskis, i a'm golias, i a dennas ow mantell dhe-ves, goelyadoryon an fosow.

⁸My a'gas konjor, A vyrghes Yerusalem, mar kevowgh ow haradow, leverewgh orto ow bos klav dre gerensa.

⁹Pyth yw dha garadow moy es neb karadow arall, ty dekka yn mysk benynes? Pyth yw dha garadow moy es neb karadow arall, may hwre'ta agan konjorya yndella?

¹⁰Ow haradow yw splann ha rudhik y liw, heb par yn mysk deg mil.

¹¹Y benn yw owr, owr fin; y gudynnow yw krullys, mar dhu avel marghvran.

¹²Y dhewlagas yw kepar ha kelemmi ryb goverow dowr, golghys yn leth, desedhys yn ewn.

¹³Y dhiwvogh yw kepar ha bleujyowek a spisys gans losow sawrek ow tevi ynni; avel lili yw y dhiwweus, ow tevera gans lin myrr.

¹⁴Avel gwelynni owr yw y dhiwvregh, afinys gans topaz; y dorr yw plat[7] a dhans olifans, afinys gans saffir.

¹⁵Y dhiwarr yw kolovenyow a varbel, desedhys war grawyow a owr; y semlans yw kepar ha Lebanon, bryntin avel an kederwydh.

¹⁶Y anow yw a'n hwekka, hag ev yw plegadow yn tien. Hemm yw ow haradow ha hemm yw ow har, A vyrghes Yerusalem.