Read Kernewek An Gan a Ganow 8 Bible Online

An Gan a Ganow 8 - Kernewek bible

An Gan a Ganow 8

¹A pes avel broder dhymmo vy, neb a sugna diwvronn ow mamm! Ena, pan y'th welen vy y'n stret, my a ammsa dhis, ha ny vien vy dispresys

²My a'th hembronksa, ha'th tri a-berth yn chi ow mamm a'm omdhuk,[15] ha ri pyment dhis, sugen an greunaval.

³Yma y leuv gledh yn-dann ow fenn, hag yma y leuv dhyghow orth ow byrla!

⁴My a'gas konjor, A vyrghes Yerusalem, Na wra dhe gerensa difuna na movya bys pan vynno hi!

⁵Piw yw hemma, ow tos yn-bann dhiworth an gwylvos, ow poesa war hy haradow? Yn-dann an avalenn[16] my a'th gwrug dhe dhifuna; ena dha vamm a'th tineythis, ena yth esa hi yn lavur neb a'th omdhuk.

⁶Desedh vy avel sel war dha golonn, avel sel war dha vregh, rag bos kerensa mar grev avel ankow, hy avi mar dhibita avel ifarn; hy flammow yw lughes a dan, losk a'n kreffa.

⁷Ny yll dowrow lower difeudhi kerensa, byth moy ny yll livow hy beudhi. Mar profsa den rag kerensa oll rychys y ji, skornys yn tien via henna.

⁸Yma dhyn ni hwoer vyghan, ha nyns eus diwvronn dhedhi; pandr'a yllyn ni gul rag agan hwoer, y'n jydh may hwovynnir rygdhi?

⁹Mars yw hi fos, ni a dhrehav warnedhi tour a arghans; ha mars yw hi daras, ni a's ke gans askell kederwydh.

¹⁰Fos ov vy, hag ow diwvronn yw kepar ha touryow; yndella yth ov vy, yn y dhewlagas, kepar hag onan neb a gyv kres.

¹¹Yth esa dhe Solomon gwinlann yn Baal-hamon; ev a settyas y winlann dhe wobrenoryon. Res o dhe bub huni dri rag y frutys mil vath a arghans.

¹²Ow gwinlann, ow honan, yw dhymmo vy, ha Solomon, ty a bew an mil, ha gwithysi an frutys a bew dew kans.

¹³Ty neb usi trigys y'n lowarthyow, yma'n gowetha ow koslowes orth dha lev; gas vy dh'y glewes.

¹⁴Fisten dhe-ves, ow haradow, ha bydh kepar hag ewik po karow yowynk war an menydhyow a spisys.