Read Kernewek Furneth 10 Bible Online

Furneth 10 - Kernewek bible

Furneth 10

¹Furneth a withas an tas kynsa-formys a'n bys, hag ev unnsel kreatys; hi a'n delivras dhiworth y beghadow,

²ha ri dhodho nerth dhe rewlya pup-tra oll.

³Mes pan dhibarthas den anwiryon dhiworti yn y sorr, ev eth dhe goll drefenn yn konnar ev dhe ladha y vroder.

⁴Dre reson henna, pan veu an norvys livys, arta furneth a'n selwis, ha lewya hyns an den gwiryon dre damm a brenn a dalvosogeth vyghan.

⁵Furneth ynwedh, pan via an kenedhlow yn drog-unnverheans gorrys yn deray, hi a aswonnis an den gwiryon ha'y witha divlam a-rag Duw, ha'y witha krev yn spit dh'y druedh troha y vab.

⁶Pan esa an re dhidhuw ow merwel hi a dhelivras den gwiryon, neb a fias dhiworth an tan a goedhas war an pymp sita.

⁷Hwath bys y'n jydh hedhyw yma dustuni a'ga drogober: difeyth ow megi prest, plansow ow toen frut na adhves nevra, ha pilar a hoelan ow sevel avel men-kov dhe enev diskryjyk.

⁸Rag drefenn i dhe dremena dres furneth, ny vons unnsel lettys ma na aswonnsons an taklow da; mes ynwedh i a asas war aga lergh dhe'n bys men-kov a'ga follneth, ma na allas aga difygyow nevra bos heb aga merkya.

⁹Mes furneth a dhelivras dhiworth ankenyow an re a's servyas.

¹⁰Pan fias den gwiryon dhiworth konnar y vroder, hi a'n gidyas yn hynsyow ewn; hi a dhiskwedhas dhodho gwlaskor Duw, ha ri dhodho godhvos a daklow sans; hi a'n gwrug dhe siwena yn y lavuryow, hag ynkressya frut y lavur.

¹¹Yn krefni an re esa orth y arwaska, hi a sevis rybdho ha'y wul rych.

¹²Hi a'n defendyas dhiworth y eskerens, ha'y witha saw dhiworth an re a'n kontrewaytyas; yn y gesstrif kales hi a ros dhodho an trygh, may hwodhve bos revrons dhe Dhuw kreffa ages pup-tra oll.

¹³Pan veu den gwiryon gwerthys, ny wrug furneth y forsakya, mes hi a'n delivras dhiworth pegh. Hi eth yn-nans ganso a-ji dhe'n pytt,

¹⁴ha pan esa ev yn kadonyow ny'n gasas, bys pan dhros dhodho an dernwelenn a wlaskor hag awtorita war an re esa orth y arwaska. An re a'n kuhudhas hi a dhiskwedhas dhe vos fals, ha hi a ros dhodho enor bythkwethek.

¹⁵Pobel sans ha has divlam, furneth a's dhelivras dhiworth kenedhel a arwaskoryon.

¹⁶Hi a entras yn enev gwas an Arloedh, ha sevel orth myghternedh euthyk gans marthusyon hag arwoedhyow.

¹⁷Hi a ros dhe bobel sans gober aga lavuryow; ha'ga hembronk yn fordh varthys, ha dos ha bos goskes dhedha y'n jydh, ha flamm sterennek y'n nos.

¹⁸Hi a's dros dres an Mor Rudh, ha'ga hembronk dre dhowrow down;

¹⁹mes hi a veu dhis aga eskerens, ha'ga thewlel yn-bann dhiworth downder an mor.

²⁰Rakhenna an re wiryon a byllas an re dhidhuw; i a ganas hymnys dhe'th hanow sans, A Arloedh, ha gormel gans unn akord dha leuv a's defendyas;

²¹rag furneth a igoras ganow an re avlavar, ha gul dhe daves fleghigow kewsel yn kler.