Read Kernewek Furneth 11 Bible Online

Furneth 11 - Kernewek bible

Furneth 11

¹Furneth a wrug dh'aga ober siweni dre leuv profoes sans.

²I a vyajyas dre wylvos anannedhys, ha settya yn-bann aga thyldow yn tylleryow hepfordh.

³I a sevis orth aga eskerens ha pellhe aga erbynnoryon.

⁴Pan y's tevo syghes, i a elwis warnas, ha dowr a veu res dhedha mes a garrek flynt, ha dhiworth men kales remedi rag aga syghes.

⁵Rag der an keth taklow may feu aga eskerens kessydhys dredha, i aga honan a gavas dader yn aga edhomm.

⁶Rag yn le fenten a avon prest ow resek, troblys ha defolys gans goes,

⁷yn keredh rag an ordenans dresto may feu an fleghigow ledhys, ty a ros dhedha kals dowr nag o gwaytys,

⁸ow tiskwedhes der aga syghes y'n termyn na fatell gessydhsys aga eskerens.

⁹Rag pan vons prevys, kynth esens ow pos dyskyblys yn tregeredh, i a wodhva fatell veu an re dhidhuw tormentys pan vons breusys yn sorr.

¹⁰Rag ty a's provas kepar dell wra tas, orth aga heski yn gwarnyans, mes an re dhidhuw ty a worthapposyas, ha'ga dampnya kepar dell wra myghtern kales.

¹¹Keffrys an re dhe-ves ha'n re dhe-dre, i a vydh tormentys yn kepar maner,

¹²rag anken dewblek a's kemmeras, ha kynvann pan borthsons kov a'n taklow tremenys.

¹³Rag pan glewsons bos aga hessydhyansow aga honan dhe les rag an re wiryon, i a welas y vos ober an Arloedh.

¹⁴An den a via tewlys yn-mes nans yw pell, ha gesys dhe verwel, neb a dhenaghsons gans skorn, a dheuth ha bos marth dhedha yn diwedh an hwarvosow; an syghes a wodhavsons a veu gweth es an pyth a wodhevis an re wiryon.

¹⁵Yn attal a'n resnans foll a'ga anewnder, hag a's hembronkas yn sowdhan dhe wordhya kramviles direson ha bestes diles, ty a dhannvonas warnedha routh a greaturs direson dh'aga hessydhya,

¹⁶may tyskens, herwydh an taklow may hwra den pegha, der an keth taklow ma ev dhe vos kessydhys.

¹⁷Rag dha leuv ollnerthek hag a wrug an bys yn-mes a vater heb furv, ny fyllis a'n pygans dhe dhannvon warnedha routh a orses, po lewyon hardh,

¹⁸po bestes ankoth nowydh-gwrys leun a gonnar, a anell ethenn danek yn-mes, po hwyja yn-mes pall tew a vog, po lughesi gwryghon euthyk dhiworth aga lagas;

¹⁹ny allas an drog a wrussons unnsel distrui tus, mes ynwedh an wel euthyk anedha a allas aga distrui glan dre skruth.

²⁰Hwath heb an re ma, tus a allsa koedha gans unn anall, pan vens helghys gans gwirvreus ha skattrys der anall dha nerth. Mes ty re arayas pup-tra oll yn musur ha niver ha poes.

²¹Rag ty a yll diskwedhes dha nerth meur pup-prys, ha piw a yll sevel orth galloes dha vregh?

²²Rag yth yw oll an bys a-ragos avel motta usi ow treylya an vantol, avel banna a luth an myttin a goedh war an dor.

²³Mes tregeredhus os'ta dhe beub, rag ty a yll gul pup-tra oll, ha ny vynnydh mires orth peghosow tus, may hallons koedha yn edrek.

²⁴Rag ty a gar pup-tra eus, ha ny gesydh travyth a'n taklow re wruss'ta, rag ny wrusses neppyth mara'n kasses.

²⁵Fatell allsa neppyth pesya, mar ny ve dha vodh? Po fatell allsa neppyth bos gwithys mar ny veu gelwys yn-rag genes?

²⁶Ty a spar pup-tra oll, rag ty a's pew, A Arloedh, ty neb a gar enevow.