Read Kernewek Furneth 12 Bible Online

Furneth 12 - Kernewek bible

Furneth 12

¹Rag yma dha spyrys anvarwel yn pup-tra.

²Rakhenna ty a ewnha tamm ha tamm an re a dreuspass, ha ty a's kovha ha gwarnya a-dro dhe'n taklow may peghons dresta, may hallons bos rydhhes a'ga sherewynsi ha gorra aga fydh ynnos jy, A Arloedh.

³An re esa trigys y'th tir sans nans yw pell

⁴ty a gasas rag aga oberow kasadow, aga oberow a bystri, hag urdhyansow ansans.

⁵I a ladhas fleghes yn tidruedh, ha dybri yn aga goelyow kig ha goes denel sakrifiys; kevrennoryon vons yn kryjyans kevrinek,

⁶ynno may hwrug kerens ladha enevow diweres. Ytho ty a vynnas aga distrui dre leuv agan tasow,

⁷may halla an tir yw akontys genes an moyha enorys degemmeres fleghes Duw avel trevesigeth wordhi.

⁸Mes ty a's sparyas, rag nyns ens saw tus, ha dannvon goghi avel ragresoryon a'th lu dh'aga distrui tamm ha tamm,

⁹kyn nag es'ta dialloes dhe ri an re dhidhuw a-ji dhe dhiwla an re wiryon yn batel, po aga distrui yn unn lamm gans bestes fell, po gans dha er asper.

¹⁰Mes orth aga breusi tamm ha tamm ty a ros dhedha chons a edrek, kyn nag es'ta heb godhvos bos aga natur drog, ha bos aga sherewynsi genesik ynna, ha na vedha nevra aga thybyansow treylys.

¹¹Rag has mollothek dhiworth an dalleth ens. Ha nyns esa rag own a dhenvyth y's gessys heb kessydhyans rag aga feghosow.

¹²Rag piw a lever, ‘Pandr'a wrussys?’ po piw a sev orth dha vreus? Piw a'th kuhudh rag distruyans kenedhlow a wrussys? Po piw a dheu a-ragos dhe bledya rag an dus anwiryon?

¹³Rag naneyl nyns eus duw marnas ty, mayth yw pub den oll bern dhodho, may tiskwetthes dhedha na vreussys yn anewn;

¹⁴na ny yll na myghtern na turant settya y fas er dha bynn a-dro dhe'n re re gessydhsys.

¹⁵Ty yw ewn ha ty a rewl pup-tra yn ewn, ow tybi y vos estren dhe'th halloes dampnya nebonan na dhervynn bos kessydhys.

¹⁶Rag dha alloes yw dalleth ewnder, ha'th vyghternses war beub a wra dhis sparya peub.

¹⁷Pan berth tus dout a berfydhder dha alloes, ty a dhiskwa dha nerth, ha ty a geredh tonteth yn mysk an re a'n goer.

¹⁸Kynth os'ta sovran yn nerth, ty a vreus gans kuvder, ha gans favour meur ty a'gan govern; rag ty a yll devnydhya galloes peskweyth may fynni.

¹⁹Der oberow a'n par ma ty re dhyskas dhe'th pobel bos res an re wiryon dhe vos kuv, ha ty re lenwis dha vebyon gans govenek da, drefenn ty dhe ri edrek rag peghosow.

²⁰Rag mar kessydhsys gans rach meur eskerens dha wesyon ha'n re a dhervynnas an mernans, ow ri dhedha termyn ha tyller dhe asa aga sherewynsi,

²¹gans pana stroethter a vreusys jy dha vebyon, may resys dh'aga thasow tiow ha kevambosow leun a ambosow da!

²²Ytho pan esos orth agan kessydhya ty a skorj agan eskerens deg milweyth moy, may hyllyn ombrederi war dha dhader pan vreusyn, ha pan on breusys, gwaytyas truedh.

²³Rakhenna an tus a vewas aga bewnans yn anwiryon, yn bewnans a follneth, ty a dormentyas der aga thaklow kasadow aga honan.

²⁴Rag pan ethons pell yn sowdhan war hynsyow kammweyth, ow tegemmeres avel duwow an bestes o hwath dispresys gans aga eskerens, i a veu toellys kepar ha fleghigow foll.

²⁵Rakhenna, kepar dell ve dhe fleghes na yll resna, ty a dhannvonas dha vreus dh'aga gesya.

²⁶Mes an re na woslowas orth gwarnyansow keredhyow hwar a glew breus Duw a dhendilsons.

²⁷Rag pan dheuthons ha bos serrys yn aga duwon orth an taklow na a dybsens bos duwow, ow pos kessydhys dredha, i a welas hag aswonn avel gwir Dhuw ev neb a skonsons dhe aswonn kyns. Yndella dampnyans a'n brassa a dheuth warnedha.