Read Kernewek Furneth 13 Bible Online

Furneth 13 - Kernewek bible

Furneth 13

¹Rag foll aga gnas o oll tus heb aswonnvos a Dhuw; ha ny allsons aswonn ev neb usi yn bosva, yn-mes a'n taklow da yw gwelys, ha ny aswonnsons an Unn usi ow pos, hag i ow prederi a'y oberow;

²mes i a dybis po tan po gwyns po ayr skav, po kylgh an ster, po dowr terfyskus, po golowys nev dhe vos duwow a rewl an bys.

³Mar tybi tus, dre dhelit yn aga thekter, an taklow ma dhe vos duwow, godhvydhens pygemmys gwell ages an re ma yw aga Arloedh, rag awtour tekter a's gwrug.

⁴Ha mara's teva marth orth aga galloes hag oberyans, konvedhens dresta pygemmys kreffa yw ev neb a's gwrug.

⁵Rag der an braster ha tekter a daklow gwrys, pan yns kehevelys, y hyllir gweles an Gwrier.

⁶Hwath nyns yw an bobel ma dhe vos kablys marnas nebes, rag martesen i a yn sowdhan hag i ow hwilas Duw hag ow tesirya y gavoes.

⁷Rag kyn fewons yn mysk y oberow, hwath i a'n hwila, ha krysi an pyth a welons, rag teg yw an taklow gwelys.

⁸Mes ynwedh, ny yllir aga gava;

⁹rag mara's teffa an galloes dhe wodhvos kemmys may hallsens hwithra an bys, fatell wrussens fyllel dhe gavoes yn kynsa an Arloedh a'n taklow ma?

¹⁰Mes truan yw an re ma gans aga fydh settys yn taklow marow, a re an hanow ‘duwow’ dhe oberow diwla tus, owr hag arghans shapys gans sleyghneth, ha hevelebow a enyvales, po men diles, ober leuv goth.

¹¹Lemmyn ser prenn a yll treghi dhe'n leur gwydhenn es dh'y handla ha kemmeres dhe-ves gans sleyghneth oll hy rusk, hag ena gans kreft plegadow gul lester dhe les hag a serv edhommow bewnans,

¹²ha leski an temmyn a'y ober yw tewlys dhe-ves dhe bareusi y voes, ha dybri dh'y walgh.

¹³Mes ev a gemmer tamm yn-mes anedha, nag yw dhe les, tamm a brenn kamm ha leun a golmow, ha'y gervya gans rach yn y dermyn rydh, ha'y shapya gans sleyghneth gwaynys yn sygerneth; ev a'n furv yn imaj den,

¹⁴po y wul avel neb enyval diles, ha'y bayntya rudh ha liwa y enep rudh ha kudha pub namm ynno gans paynt;

¹⁵ena ev a wra neythik gwiw ragdho ha'y settya yn fos, ha'y fastya ena gans horn.

¹⁶Ev a breder anodho, ma na goettho, drefenn ev dhe wodhvos na yll gweres y honan, rag nyns yw marnas imaj hag a'n jeves edhomm a weres.

¹⁷Pan wra pysadow a-dro dh'y bythow ha'y demmedhyans ha'y fleghes, ny'n jeves meth dhe gewsel dhe'n dra dhivew.

¹⁸Rag yeghes ev a elow dhe neppyth yw gwann; rag bewnans ev a bys war neppyth yw marow; rag gweres ev a bys war neppyth heb prevyans; rag vyaj da ev a bys war neppyth na yll devnydhya y dreys;

¹⁹rag gwaynya arghans hag ober ha siwena gans y dhiwla ev a bys rag nerth dhiworth neppyth na'n jeves nerth vyth yn y dhiwla.